Էրիկ Մկրտչյանը ծնվել է 2001 թվականին Վանաձորում։ Դպրոցն ավարտելուց հետո՝ 2019-ի հուլիսի 17-ին, զորակոչվել է բանակ, ծառայել Խնձորեսկում։ 44-օրյա պատերազմի օրերին կռվել է Ջրականում։ Հոկտեմբերի 16-ին անօդաչուի հարվածից բեկորային ծանր վիրավորում է ստացել ողնաշարի հատվածում։
«Վիճակն ահավոր էր, երանի չտեսնեի էդ պահերը․ զինակից ընկերս իմ ոտքերի վրա էր՝ արդեն մահացած․․․»,-հիշում է Էրիկը։
Վիրավորման հետևանքով չի քայլում, վերականգնողական բուժում է ստանում Զինվորի տանը։ Բուժմանը զուգահեռ Էրիկն ընդգրկված է տեղի տարբեր ծրագրերում․ աշխատում է «Գեղեցկություն զինվորներից» նախագծում ու պարում Զինվորի տան պարախմբում։ Էրիկի խոսքով՝ Զինորի տանը հեշտ էր, որովհետև այստեղ մենակ չէր, շրջապատված էր իր նման տղաներով, որոնց հետ էլ աստիճանաբար կյանք վերադարձավ։
