Ապրիլի առաջին կիրակին Հայաստանում նշվում է Երկրաբանի օրը։ «Երկրաբանությունը եղել ու մնում է ամենառոմանտիկ մասնագիտությունը։ Գարնան գալուն պես սկսվում են դաշտային աշխատանքները, և մեր մասնագիտական տոնը համընկնում է դրան։ Բայց այս տարի որոշեցինք ավելի շքեղ նշել մեր օրը և Երևանի պետական համալսարանի պատմության թանգարանի հետ համատեղ կազմակերպեցինք գեղեցիկ մի ցուցահանդես, որտեղ ներկայացրինք նաև քարերի նմուշներ, փաստաթղթեր մեր պահոցներից»,- ասում է Երկրաբանության թանգարանի տնօրեն Գայանե Գրիգորյանը։
Հայոց լեռներում հայտնաբերված քարատեսակները հիացնում են իրենց բազմազանությամբ և գեղեցկությամբ։ Իսկ երկրաբանական ուսումնասիրությունների մասին փաստաթղթերը հետաքրքիր են անգամ այսօր։ Այդպիսիք են, օրինակ, պրոֆեսոր Հովհաննես Կարապետյանի քարտեզները, որը Հայաստանի ընդերքը գիտեր «իր տան պես»։
Նա մեկառմեկ ցույց է տվել, թե որտեղ ինչ հանքանյութ կա և երբ կարող են դրանք արդյունահանել։
Երևանի պետական համալսարանը երկրաբանական կադրերի դպրոց է։ Եվ այս մասնագիտությամբ շատ երիտասարդներ են հետաքրքրված։ Իսկ ցուցահանդեսը դիտելուց հետո դրանց թիվն, անշուշտ, կավելանա։
