Նրանց ձեռքով անցած փաստաթղթերի ուժն անբեկանելի է, սովորաբար դրանք մեր կյանքում շատ մեծ ու կարևոր նշանակության փաստաթղթեր են։ Նրանց ձեռքով անցած փաստաթղթերը դատարանն ընդունում է որպես անառարկելի ապացույց։
Այսօր խոսելու ենք մի անչափ հետաքրքիր մասնագիտության մասին, մասնագիտություն, որն աշխատատար և բարդ, եկամտաբեր և չափազանց պատասխանատու է, մասնագիտություն, որն իր արդիականությունը չի կորցրել անգամ տեղեկատվական տեխնոլոգիաների մեր դարաշրջանում։
Այսօր խոսելու ենք նոտարի մասնագիտության մասին։ Նոտարը մատուցում է արդարադատության իրականացմանը նպաստող հանրային ծառայություններ, պետության անունից իրականացնում է օրենքով նախատեսված նոտարական գործողություններ և ծառայություններ։
Բոլոր նոտարներն ունեն իրավաբանական կրթություն։ Եթե խելացի եք և պատասխանատու, անկողմնակալ ու գաղտնապահ, ազնիվ և արդար, հավասարակշիռ ու սթրեսակայուն, տիրապետում եք հաղորդակցման էթիկային, ունեք վերլուծական մտածողություն, արագ կողմնորոշվելու և ծառացած խնդիրներին ճիշտ ու արդյունավետ արձագանքելու ունակություն, ապա նոտարի մասնագիությունը նախատեսված է Ձեզ համար և դուք միշտ կվայելեք մեծ հեղինակություն:
Զրույց Երևան նոտարական տարածքի նոտար, իրավաբանական գիտությունների թեկնածու Իռեն Սարգսյանի հետ։