«Իմ քայլը» քաղաքացիական շարժմանն այսօր Արմավիր քաղաքում միացան նաև մարզի տարբեր համայնքների երիտասարդներ:
Շարժման մասնակիցները առավոտյան հավաքվել էին Արմավիր քաղաքի թիվ 4 ավագ դպրոցի մոտ և քայլերթով շարժվել դեպի հանրապետության փողոց՝ կոչ անելով բոլորին միանալ քայլերթին:
Երիտասարդների թվում կային նաև դպրոցահասակ երեխաներ:
Քայլերթի մասնակիցները փորձեցին փակել երկողմանի երևեկություն ունեցող փողոցը, սակայն ոստիկանները թույլ չտվեցին, քայլերթը շարունակվեց փողոցի մի կողմով:
Ցուցարարները երբեմն կանգ էին առնում խաչմերուկներում, կրկին փորձ անում փակել երթևեկությունը, բայց ոստիկանները նույնպես միջամտում էին: Քաղաքային զբոսայգու մոտ ոստիկանները ցուցարարներին դուրս հանեցին փողոցից և երթը շարունակվեց մայթով:
«Իմ քայլը» շարժման մասնակիցները Երևանյան և Հանրապետության փողոցում լուսացուցի կարմիր ազդանշանի տակ սկսեցին մեծ խմբերով փողոցը անցուդարձ անել, գրեթե 20 և ավելի անգամ: Նրանց այս քայլը զայրացնում էր ոստիկաններին:
Երթի մասնակիցները միասնության կոչերով դարձյալ ետ շարժվեցին դեպի քաղաքի հրապարակ: Ցուցարարների շարքերն աստիճանաբար ընդլայնվում էր տարբեր համայնքների և ուսանողական հաստատությունների երիտասարդներով: Շարժման մասնակիցներին հետևում էին նաև համազգեստավոր և քաղաքացիական զգեստներով ավելի շատ ոստիկաններ, որոնք երիտասարդներին երբեմն ահաբեկում էին:
Արմավիրի թիվ 2 դպրոցի դիմաց ցուցարաները սկսեցին անցուդարձ անել նաև հետիոտնի համար թույլատրելի դեղին գծերով, ճանապարհի այս հատվածում չկա լուսացույց:
Փոխելով ճանապարհը երթը շարունակվեց Ջիվանու միակողմանի երթևեկություն ունեցող փողոցով: Հասնելով ոստիկանության Արմավիրի բաժնի շենքի մոտ նրանք փորձեցին հանգստանալ և նստել շենքի դիմացի աստճաններին: Երիտասարդները շարունակ միմյանց կոչ էին անում վեճի չբռնվել ոստիկանների հետ, սադրանքների չենթարկվել:
Ցուցարարներին ցրելու նպատակով դպրոցների, ուսումնական հաստատությունների մանկավարժները հետևում և դուրս էին բերում իրենց ուսանողներին, սովորողներին ցուցարարների շարքերից: Քայլերթը դադրեցվեց ժամը 14-ի սահմաններում: Երեկոյան ժամը 18-30-ին կրկին կմեկնարկեն բողոքի ցույցը:
