![](https://hy.armradio.am/wp-content/uploads/2024/06/447757299_753079520322083_8141640760203576029_n-e1717739296247.gif)
Եվրախորհրդարանը Եվրամիության օրենսդիր մարմինն է, որն ընտրվում է յուրաքանչյուր հինգ տարին մեկ՝ ԵՄ անդամ պետությունների քաղաքացիների կողմից։ Այն ստեղծվել է 1957 թվականին, և ձևավորվում էր ԵՄ անդամ պետությունների խորհրդարանների կողմից։ Սակայն 1979 թվականից ի վեր խորհրդարանը ընտրվում է բնակչության կողմից։ Եվրախորհրդարանը համարվում աշխարհի ամենաազդեցիկ օրենսդրական մարմիններից մեկը։ Խորհրդարանի անդամները ներկայացնում են Եվրամիության քաղաքացիների շահերը։
Հունիսի 9-ին Եվրախորհրդարանի ընտրություններն են։ Այս ընտրություններին մասնակցում են ազգությամբ հայեր՝ պատգամավորի թեկնածությամբ ու կուսակցությունների կազմում։
![](https://hy.armradio.am/wp-content/uploads/2024/06/434408350_10159451036506829_3999437983270308986_n-731x1024.jpg)
![](https://hy.armradio.am/wp-content/uploads/2024/06/434408350_10159451036506829_3999437983270308986_n-731x1024.jpg)
Բելգիայում բնակվող Արմինե Հարեյանը Եվրախորհրդարանի պատգամավորության թեկնածու է: Ներկայացնում է «Բարեփոխումների շարժում» կուսակցությունը, որը Բելգիայում ճանաչում և լավ վարկանիշ ունի:
«Այս ընտրություններում հայ թեկնածուները հինգն են: Մենք մեր թեկնածությունները ներկայացրել ենք շրջանային, ֆեդերալ և եվրոպական խորհրդարանների ընտրություններում: Երեքն էլ կարևոր են թե՛ համայնքի հարցերը ներկայացնելու, թե՛ հայկական հարցերը առաջ քաշելու համար», — ասում է Արմինե Հրեյանը:
Կուսակցությունը, որը ներկայացնում է մեր հայրենակցուհին, լիբերալ, կենտրոնական աջ կուսակցություն է, ունի լավ հեղինակություն Բելգիայում: «Ես կուսակացության ցուցակում վեցերորդն եմ: Բոլորս էլ պայքարում ենք հաղթանակի համար, ինչին աջակցում է նաև մեր համայնքը: Ի դեպ, բոլոր հինգ հայ թեկնածուներն էլ զգում են այդ աջակցությունը: Մեզ ներկայացնելու համար կազմակերպվում են միջոցառումներ, հանդիպումներ: Սակայն կարևոր են նաև հանդիպումները օտարների հետ: Հանդիպում ենք ազգային այլ փոքրամասնությունների հետ ևս, որոնց անհանգստացնող հարցերը նույնպես կարող ենք բարձրացնել խորհրդարանում: Այս կուսակցությունն արդեն ինչ-որ չափով հայկական լոբբինգի մաս է կազմում», — ասում է Արմինեն և ավելացնում, որ վերջին չորս տարիների ընթացքում հայամետ չորս բանաձև է ընդունվել այս կուսակցության շնորհիվ: Ի դեպ, այն իր նախընտրական ծրագրում առանձին բաժին ունի՝ վերաբերող Հայաստանին ու Արցախին:
«Եվրախորհրդարանում հայամետ օտարազգի պատգամավորներ կան, որոնք մեր հարցերը բարձրացնում են: Սակայն ծագումով հայ պատգամավորներն ավելի արագ կարձագանքեն հակահայ հարցերին ու պատգամավորների ելույթներին, որնոք, ի դեպ, քիչ չեն եվրախորհրդարանում», — նշում է թեկնածուն:
«Այս տարիների ընթացքում հայության խնդիրը եղել է տնտեսական հասարակությանն ինտեգրվելը: Ժամանակն է, որ երկրներին ինտեգրվելու և համայանքային հարցերը բարձրաձայնելու համար զբացվենք քաղաքականությամբ ու մաս կազմենք միջազգային կառույցներին», — նշում է Արմինե Հարեյանը:
![](https://hy.armradio.am/wp-content/uploads/2024/06/mariam.jpg)
![](https://hy.armradio.am/wp-content/uploads/2024/06/mariam.jpg)
Մարիա Քալաշյանն ապրում է Ֆրանսիայում։ Երիտասարդ հայուհին ակտիվ գործունեություն է ծավալում եվրոպական կառույցներում, իսկ հունիսի 9-ի ընտրությանը մասնակցելու է ՝պաշտպանելով գործող նախագահ Էմանուել Մակրոնի «Վերածնունդ» կուսակցությանը, որին նաև անդամակցում է։
«Ես պատգամավորի թեկնածու չեմ, սատարում եմ իմ կուսակցությանը: Եվրախորհրդարանի ընտրությունները Ֆրանսիական խորհրդարանական ընտրություննրից տարբերվում են», -ասում է Մարիան:
«Պետք է նշեմ, որ առաջին տեղում, ըստ սոցհարցումների Ջորդան Բարդելան է, որը ներկայացնում է Մարի Լը Պենի կուսակցությունը: Կուսակցություն, որը կամ դեմ է քվեարկել Արցախին ու Հայաստանին վերաբերող հարցերին, կամ ՝ ձեռնպահ մնացել: Ի տարբրություն այդ կուսակցության, Էմանուել Մակրոնի կուսակցության անդմները բոլոր խորհրդարաններում մշտապես բարձրացնում են Հայաստանին ու Արցախին վերաբերող հարցերը ու իրենց աջակցությունը հայտնում Հայաստանի տարածքային ամբողջականության վերաբերյալ: Վալերի Էյեն, որ մեր կուսակցության ցուցակն է գլխավորում, միշտ զբաղվել է հայկական հարցերով: Կարծում եմ, որ այս ընտրություններից հետո ևս կշարունակվի հայամետ աշխատանքները», — ավելացնում է Մարիա Քալաշյանը:
Ֆրանսիայի խորհրդարանում հայ պատգամավորներ կան, իսկ հայ համայնքը, որ մեծ կապեր ունի ֆրանսիայի իշխանությունների հետ, անմիջական մասնակցություն ունի այս ընտրություններում, նեգրավված է աշխատանքներում՝ նշում է Մարիան։ «Այն, որ Ֆրանսիան ռազմական պայմանագիր է կնքել Հայաստանի հետ, անվտանգային երաշխիք է Հայաստանի համար»։
Ի՞նչ մասնակցություն և դիրքորոշում ունեն հայ համայնքի ներկայացուցիչները։ Մարիան նշում է. «Ֆրանսիայի հայերից շատերը ֆրանսիայի քաղաքացիություն չունեն և չեն տիրապետում լեզվին: Բազմաշերտ հայ համայնքի մի մասը դեմոկրատ է և աջակցում է Հայաստանին և Հայաստան-Եվրամիություն կապին, մյուս հատվածը Դաշնակցություն կուսակցությանը պատկանողներն են և երրորդը լուռ հասարակությունն է, որն անհանգիստ է Հայաստնաի ապագայի համար, բայց որևէ կուսակցության չի անդամակցում»:
Եվրախորհրդարանի այս ընտրություններին քվեարկելու իրավունք ունեն 16-ը լրացած եվրոպացիները, իսկ եվրախորհրդարանի պատգամավորության թեկնածուները բավականին երիտասարդ են: «Ես դեռ պատրաստ չեմ պատգամավորության համար իմ թեկնածությունը դնել: Այսօրվա աշխարհաքաղաքականությունն այն փուլում է, որ պետք են պրոֆեսիոնալ ու բանիմաց պատգամավորներ: Գուցե մինչև հաջորդ ընտրություն ես պատրաստ կլինեմ մասնակցել Եվրախորհրդարանում պատգամավոր դառնալուն», — եզրափակում է Մարիա Քալաշյանը: