Ժամանակակից արվեստի ինստիտուտի կրթական ծրագրի ղեկավարներ Լիլիթ Գրիգորյանը և Կարինե Արոյանը խոսում են Ժամանակակից արվեստի ինստիտուտի կրթական ծրագրերի մասին։
Ինստիտուտի նոր, էքսպերիմենտալ ֆորմատը Արվեստի ու արվեստաբանության խորացված ուսումնասիրությունների դպրոցն է, որն աշխատում է արվեստանոցների սկզբունքով։ Գործում է 4 արվեստանոց, որտեղ սովորում են հումանիտար կամ հարակից ոլորտում կրթություն ստացած մարդիկ։ Սա հետբուհական կրթության ոչ ֆորմալ ձևաչափ է։
4 արվեստանոցներն իրենցից ներկայացնում են Տեսողական ուսումնասիրությունների, Կատարողական պրակտիկաների, Հետազոտության հենքով արվեստի ստուդիաներն ու Սոցիոլոգիական ուսումնասիրությունների դպրոցը։
Ծրագրի ղեկավարներն ասում են, որ իրենց օրակարգը ոչ միշտ է հիմնվում կամ ձևավորվում պահանջարկի վրա։ «Եթե նայենք պահանջներին, շատ մեծ պահանջարկ կա կուրատրության դպրոցի, մյուս կողմից կարևոր է, որ մենք անենք առաջարկներ, որը շուկայում չկա և չունի կարիք, քանի որ մարդիկ դեռ չգիտեն, որ հնարավոր է նաև այդ ձևով մոտենալ կրթությանը»։
Ինստիտուտը կարևորում է արվեստաբանության ոլորտում անկախ հետազոտողների ներկայությունը, որը հիմք է ստեղծում ակադեմիական տեսական միտքը զարգացնելու ուղղությամբ։ Կարևոր է հայ ժամանակակից արվեստի մասին գրավոր տեքստեր ունենալը, որպեսզի համացանցում հասանելի լինեն արվեստի նախաձեռնությունների, շարժումների մասին տեքստերը։
Շուտով մեկնարկելու է «Ինչպես գոյատևել որպես սկսնակ արվեստագետ» ծրագրի երկրորդ մասը։ Մեկնաբանելով այս ծրագիրը ղեկավարները նշում են, որ ծրագրի առաջին մասի ավարտին պատրաստվելու է ուղեցույց, որն անդրադառնալու է մի շարք կարևոր թեմաների ու հարցերի․ օրինակ ինչպես արվեստագետն աշխատի ֆինանսների կամ համադրողի հետ, մտավոր սեփականության և այլ հարցերի շուրջ։
«Մենք սովորեցնում ենք, երբ դու ունես հմտություններ ու չգիտես ինչպես քեզ դիրքավորել որպես արվեստագետ, այդ իմաստով իրար լրացնում են ֆորմալ կրթությունն ու մեր տված ոչ ֆորմալ կրթությունը»։