Ժամանակին մեծ աղմուկ հանած օրինագծերը նոր ձևավորված կառավարությունը ցանկանում է որոշակի փոփոխությունների ենթարկել։ Թերևս ամենաղմկահարույցն ու քննարկվողը մինչ այսօր էլ շարունակում է մնալ պարտադիր կուտակային կենսաթոշակային համակարգի ներդրումը:
Աշխատանքի և սոցիալական հարցերի նախարար Մանե Թանդիլյանը, որ ժամանակին «Դեմ եմ պարտադիրին» նախաձեռնության ակտիվիստներից էր, ասում է, որ կուտակային կենսաթոշակային համակարգ Հայաստանին միանշանակ պետք է, սակայն պարտադիր բաղադրիչի առումով ունի որոշակի վերապահում:
Հետաձգումն ինչ ազդեցություն կունենա ֆինանսական շուկայի վրա։ Տնտեսագետ Վահագն Խաչատրյանը ճիշտ է համարում, որ համակարգը չի չեղարկվում։ Նշում է, որ պետք է օրենքում որոշակի փոփոխություններ կատարել եւ համակարգը գրավիչ դարձնել։ Օրինակ, բացարձակ գրավիչ չէ, որ գումարները մինչև 30-ից 40 տարի անձեռնմխելի են ու մարդիկ պարզապես կարող են հետևել միայն ֆինանսական հոսքերի շարժին ու այդ գումարները որևէ կերպ չեն կարող օգտագործել:
Մեկ այլ ոչ պակաս աղմուկ հանած որոշումն էլ վերաբերվում էր դեղատոմսով դեղեր բաց թողնելուն։ Այս որոշումը բուռն քննարկումների առարկա էր դարձել ոչ միայն մասնագետների, այլև քաղաքացիների շրջանում: Առողջապահության ոլորտի մասնագետները որոշումը հապճեպ էին համարում՝ նշելով, որ համակարգի բոլոր նրբություններին հասու չէին ոչ միայն քաղաքացիները, այլ անգամ բժիշկները։ Առողջապահության նորանշանակ նախարար Արսեն Թորոսյանը իր որոշումը հայտնեց ֆեյսբուքյան էջով:
Եթե այս որոշումներին հասարակությունը դրական է արձագանքում, ապա նույնը չենք կարող ասել ոստիկանության կողմից վարորդների տույժ-տուգանքների չեղարկման որոշմանը: Տնտեսագետ Վահագն Խաչատրյանը ասում է, որ ցանկացած ֆինանսական համարում ունի և դրական, և բացասական արձագանք, պետք է գտնել ոսկե միջինը:
Կդադարեցվի 2012 թվականի հունվարի 1- ից մինչև 2017 թվականի դեկտեմբերի 31-ը կայացված վարչական ակտերի կատարումը: Կչեղարկվեն մոտ 14 միլիարդ դրամի չափով տուգանքներ:
