Մեկ ու կես տարի առաջ մի խումբ երաժիշտների նախաձեռնությամբ մայրաքաղաքի «Արդեան» ցուցասրահում փորձ արվեց հաստատել նոր մշակութային ժամանցի ձևաչափ, որն այնպիսի հարթակ կստեղծեր, ուր համազոր կերպով կներկայացվեին կերպարվեստը, երաժշտությունը, գրականությունը և այլ արվեստներ:
Նպատակ էր դրվել միջոցառումներն անցկացնել կանոնավոր կերպով, այն է՝ ամեն հինգշաբթի: «Երաժշտական եռանկյունու» այս թողարկման հյուրերն են ՀՀ վաստակավոր արտիստ, երգչուհի Աննա Մայիլյանը, Հայաստանի ազգային ֆիլհարմոնիկ նվագախմբի կոնցեյտմաստեր, ֆլեյտահար Նարեկ Ավագյանը, «Արդեան» ցուցասրահի հիմնադիր, ճարտարապետ, դիզայներ Վազգեն Բրուտյանը և ճանաչված ֆլեյտահարուհի Նելլի Մանուկյանը:
«Իհարկե, ցուցասրահներում հանդեսներ կազմակերպելու ավանդույթը Հայաստանում չի ծնվել: Ժամանակ առ ժամանակ Երևանի տարբեր ցուցասրահներում, արվեստանոցներում կազմակերպվում էին տարբեր միջոցառումներ, բայց մենք մշակեցինք մի քանի սկզբունքներ, որոնք առանձնացնում են մեր «հինգշաբթիները» մնացածներից: Այն է՝ միջոցառումները բաց են հասարակության համար, մուտքն անվճար է, հանդիսատեսն իր ցանկությամբ է գնահատում արվեստագետների աշխատանքը, և գոյացած գումարն ամբողջովին տրամադրվում է երաժիշտնեին, քանի որ մեր ցուցասրահն առաջին հերթին նոր միջավայր և մշակութային դաշտին հարիր նոր հարաբերություններ ստեղծելու տիրույթ է երաժիշտների և հանդիսատեսի միջև»,-ասում է Վազգեն Բրուտյանը:
Մեկ ու կես տարվա ընթացքում կազմակերպվել են հիսունից ավելի միջոցառումներ, որոնց մեծամասնությունն իհարկե կազմում են համերգները, նաև կազմակերպվել են հանդիպումներ ժամանակակից գրողների հետ, գրքերի շնորհանդեսներ և հանդիպումներ հայտնի արվեստագետների հետ: Այնպես ստացվեց, որ բացի հայաստանյան արվեստագետներից, միջոցառումների մասնակիցները նաև եղել են արվեստագետներ այլ երկրներից, այսպիսով հաղորդելով «հինգշաբթիներին» միջազգային բնույթ՝ դերասանուհի Նորա Արմանի, ջազային դաշնակահար Ջոել Մարթին, կիթառահար Լարի Համետ և այլն:
«Կարևորագույն ուղղություններից հանդիսանում է դասական երաժշտության առկայությունը «հինգշաբթիներում»: Բնականաբար, խոսքը գնում է կամերային երաժշտության մասին, և այստեղ ոչ միայն անհատ մենակատարների մենահամերգներն են, այլ նաև լարային քառյակների, երգեցիկ խմբերի և այլ ձևաչափերի նվագախմբերի ելույթները, որոնցից կարելի է առանձնացնել «ԿՎ արտ» անսամբլը, «Միրզոյան քառյակը», «Երևան քառյակը», «Ավետիս» և «Վելվետ» քառյակները: Նաև ելույթներով հանդես են եկել «Խազեր» և «Լիլլա» երգեցիկ խմբերը»,-շարունակում է ֆլեյտահար Նարեկ Ավագյանը, ով հաճախ հանդես է գալիս «Արդեանում»՚՝ ներկայացնելով դասական և ժամանակակից երաժշտության այնպիսի ստեղծագործություններ, որոնք երբևիցե չեն հնչել հայաստանյան բեմերում:
«Ոչ պակաս կարևոր է հայկական ազգային երաժշտություն հնչեցնելը իր ամբողջ բազմազանության մեջ: Այստեղ նույնպես կարևոր է ներկայացնել ոչ միայն ավանդական, կոմիտասյան և ժամանակակից ազգային պաշարը, այլ նաև ժանրային առումով ցույց տալ այն բազմազանությունը, որը հատուկ է ժամանակակից հայ բեմին: Այս առումով կառանձնացնեի իմ վոկալ եռյակի, երիտասարդ «Շուշիկի» բենդի ժողովրդական երաժշտության յուրօրինակ մշակումները, «Հովել» նախագծի համերգը, որը ներկայացնում էր երիտասարդ կոմպոզիտոր Էլեն Յոլչյանի երաժշտությունը՝ գրված Ներսես Շնորհալու 24 աղոթքներով: Այստեղ շատ կարևոր է համաչափության մեջ պահել ժողովրդական և հոգևոր երաժշտության բաժինները»,-ասում է երգչուհի Աննա Մայիլյանը:
