Շարունակելով մեր հաղորդումներում ներկայացնել Կամերային երաժշտության կենտրոնի ստեղծագործական միավորները՝ տաղավար հրավիրեցինք «Տաղարան» հնագույն երաժշտության անսամբլի գեղարվեստական ղեկավար, ՀՀ մշակույթի վաստակավոր գործիչ Սեդրակ Երկանյանին:
«Տաղարան» անսամբլը հարուստ պատմություն ունի, անցել է հետաքրքիր զարգացման շրջաններ, դեռևս խորհրդային տարիներից ունեցել է տաղանդավոր գեղարվեստական ղեկավարներ, որոնք հարստացրել են անսամբլի երգացանկը տասնամյակների ընթացքում:
«Խորհրդային շրջանում կարծես պետության կողմից խրախուսվում էր հնագույն երաժշտության զարգացումը, հայտնի էին «Հորտուս մուզիկուս», «Մադրիգալ» համամիութենական հնչեղություն ունեցող կոլեկտիվները, և այդ տարիներին ՀՀ մշակույթի ղեկավարությունը, հետ չմնալով միութենական միտումներից՝ պայմաններ ստեղծեց Հայաստանում նույնպես հնագույն երաժշտության կոլեկտիվի ստեղծմանը։ Եվ չնայած տարբեր տարիներին տարբեր ղեկավարներ են եղել, բայց անփոփոխ է մնացել անսամբլի տեսլականը՝ համերգային հարթակից ներկայացնել հնագույն երաժշտությունը։ Պետք է պատկերացնել, որ կոլեկտիվի գործառույթը չպետք է սահմանափակվեր միայն արևմտաեվրոպական հնագույն երաժշտությամբ»- ասում է Սեդրակ Երկանյանը։
Անշուշտ, նվագարանների գործածման առումով այն պետք է լիներ համապատասխան այն նյութին, որը ստեղծվել է, օրինակ, բարոկ շրջանում, բայց նման նվագախմբի ստեղծումը նաև լայն հնարավորություն է ստեղծում հայ կոմպոզիտորների համար՝ անդրադառնալու հայկական միջնդարյան աշխարհիկ և հոգևոր երաժշտությանը՝ մշակելով այն «Տաղարանի» կազմի համար և համազոր կերպով համաշխարհային նմուշների կողքին հնչեցնելու հայկական երաժշտության գոհարները: Այդ աշխատանքը շարունակվում է մինչ օրս և այսօր անսամբլն իր համերգային ծրագրերով անդրադառնում է և՛ եվրոպական, և՛ հայկական հարուստ հնագույն, դասական, ժողովրդական և հոգևոր նյութին։
Հաղորդման ընթացքում հնչում են «Տաղարան» հնագույն երաժշտության անսամբլի համերգային կատարումները: