Ինչ են պահանջում Ջերմուկի բնակիչները
Ամուլսար գնացող ճանապարհն առավոտից փակ էր: Ջերմուկցիները պահանջում են դադարեցնել հանքի շինարարությունը, հետագայում նաև՝ հանքավայրի շահագործումը։
«Լիդիան Ինթերնեյշնլ» ընկերության փոխտնօրեն Արմեն Ստեփանյանը հստակեցրել է՝ իրենց օրակարգում աշխատանքների դադարեցման հարց դրված չէ:
Մեկ ամսվա մեջ արդեն երրորդ անգամ են ջերմուկցիները փակել դեպի Ամուլսար գնացող ճանապարհը: Ջերմուկի բնակիչ Ահարոն Արսենյանը «Ռադիոլուրին» փոխանցեց իրենց պահանջն ու որոշ մանրամասներ.
«Առավոտյան վեցին փակել էինք դեպի Ամուլսար գնացող բոլոր ճանապարհները: Այն սար է, հանքավայր չի դեռևս: Մենք երկու անգամ գնացել ու հանդիպել ենք կառավարության հետ: Սա ամբողջ Հայաստանի գլխին ծառացած մի մեծ խնդիր է: Եթե հանքը շահագործվի, ապա ամբողջ Հայաստանը լուրջ խնդրի առջև կկանգնի»:
«Ռադիոլուրի» մյուս զրուցակիցը Վազգեն Գալստյանն է: Նա հստակեցնում է՝ ոչ թե միջպետական մայրուղին, այլ դեպի Ամուլսար գնացող ճանապարհն են փակել:
«Ռադիոլուրի» հետ զրույցում «Լիդիան Ինթերնեյշնլ» ընկերության փոխտնօրեն Արմեն Ստեփանյանը հստակեցրեց .
«Երբ ասում եք, որ ջերմուկցիները փակել են ճանապարհը, պետք է ճշտում մտցնել՝ չհնչի ամբողջ համայնքը, բոլոր մարդիկ: Դա իրական չէ: Կան մարդիկ, որոնք, այո, դեմ են և ճանապարհը, որ փակել են, դրա մասին է վկայում: Բայց մի ստվար, մեծ զանգված մարդկանց կողմնակից է կամ չեզոք»:
Ճանապարհը փակող քաղաքացիների պահանջը հստակ է՝ «Մենք մեր որոշման մեջ հաստատ ենք, չենք բացելու մինչև հանքի շահագործումը չդադարեցվի»:
«Լիդիան ինթերնեյշնլում» որևէ կերպ քննարկվո՞ւմ է արդյոք շինարարական աշխատանքների կամ հանքի շահագործման դադարեցման հարցը՝ հարցնում եմ Արմեն Ստեփանյանին.
«Մենք մեր ընկերությունում, իհարկե՝ ոչ: Աշխատանքները պետք է շարունակվեն: Կառավարության ամենաբարձր մակարդակով ասել են,որ պետք է ստուգումներ լինեն, մենք սպասում ենք այդ ստուգումներին: Ինչքան շուտ լինի, այնքան ավելի լավ: Մենք վստահ ենք, որ մենք մեր աշխատանքները իրականացնում ենք պատշաճ»:
Դեպի Ամուլսար գնացող ճանապարհը փակած «Ռադիոլուրի» զրուցակիցները պնդում են՝ աշխատատեղերի մասով հանքարդյունաբերությանն այլընտրանք ունեն, Վազգեն Գալստյանը նաև վնասներն է թվարկում, որոնք այս ընթացքում հասցրել է «Լիդիան ինթերնեյշնլ» ընկերությունը: Նախ՝ զբոսաշրջիկների թիվն է նվազել, ապա երեք անգամ ջրագծերն են վնասվել
Ռիսկերը կառավարվում են՝ հակադարձում է ընկերության փոխտնօրեն Արմեն Ստեփանյանը: Դեպքեր եղել՝ չնչին՝ ավելացնում է։ Փետրվարին խողովակաշարի վթարը վերջինն է եղել։ Մեկը վերանորոգել են ապրիլին: Ջուրը բացելիս են պարզել, որ լավ վերանորոգված չի եղել:
«Ինչ վերաբերում է Արփա գետին, այո, ջրերի շրջանցող համակարգերի շինարարական աշխատանքների ժամանակ, տևական ուժեղ անձրևներ եկան այդ օրը: Եվ որոշ ցեխաջուր, այո, թափվեց: Տեղում իրականացվել են վերականգնողական աշխատանքներ, և այս պահին շտկվել է ամեն ինչ, շտկվել է»:
Երեկ բնապահպանության նախարարի տեղակալ նշանակված Այսեր Ղազարյանը օրերս գրառում էր կատարել ֆեյսբուք սոցիալական ցանցում
«Սուբյեկտիվ կարծիքս մետաղական հանքերի մասով հետևյալն է. Հայաստանը շատ փոքր և խիտ բնակեցված լեռնային երկիր է իր շատ խիստ սահմանափակ հողային ռեսուրսներով, մասնավորապես գյուղատնտեսական հողահանդակների մասով, իսկ էկոլոգիական և սոցիալական խնդիրների մասին ուղղակի չխոսեմ…. Այս քանակությամբ մետաղական հանքերը մեր երկրի համար «ճոխություն» են: Եթե մենք հաշվարկենք դրանց «իրական օգուտը» և էկոլոգիական ու սոցիալական կտրվածքներով վնասները, ապա կարելի է արձանագրել, որ դրանք մեզ և մեր երեխաների վրա թանկ են նստելու…»:
Այսօր «Ռադիոլուրին» փոխանցեց՝ որպես քաղաքացի իր կարծիքը չի փոխվել, որպես պաշտոնյա՝ պատասխանելու համար ժամանակ խնդրեց։