Մարտի 12-ին ՀՀ ցեղասպանության թանգարան-ինստիտուտում անցկացվելու է «Երիտթուրքերից մինչև նացիստներ. միջազգային քրեական արդարադատության ակունքներում» գիտաժողովը, որին մասնակցելու է Գերմանիայի Ֆրիդրիխ-Ալեքսանդրի անվան Էռլանգեն-Նյուրնբերգի համալսարանի քրեական իրավունքի, միջազգային քրեական իրավունքի և միջազգային հանրային իրավունքի պրոֆեսոր, նյուրնբերգյան սկզբունքների միջազգային ակադեմիայի տնօրեն Քրիստոֆ Սաֆերլինգը:
Գիտաժողովի ընթացքում ներկայացվելու և համեմատականներ են անցկացվելու Նյուրնբերգյան և Երիտթուրքական դատավարությունների միջև։
Նյուրնբերգյան դատավարությունը ռազմական դատավարությունների շարք է, որն անցկացվել է Երկրորդ համաշխարհային պատերազմում հաղթանակած տերությունների կողմից: Դատարանի առաջ կանգնեցին Նացիստական Գերմանիայի քաղաքական, ռազմական, արդարադատության հայտնի գործիչները, ովքեր ծրագրել, իրականացրել կամ մասնակցություն էին ունեցել Հոլոքոստին և այլ պատերազմական հանցագործությունների։
Դատավարությունները անցկացվել են Գերմանիայի Նյուրնբերգ քաղաքում, և դրանց որոշումները մեծ դեր են խաղացել դասական միջազգային իրավունքից ժամանակակից միջազգային իրավունքի անցման փուլում։ Դատավարությունների երկրորդ փուլը անցկացվել է ԱՄՆ-ում։
Երիտթուրքերի դատավարություն (1919-1920), Օսմանյան կայսրությունն առաջին համաշխարհային պատերազմի մեջ ներքաշած և հայերի տեղահանությունն ու ցեղասպանությունը կազմակերպած երիտթուրքական «Միություն և առաջադիմություն» կուսակցության ղեկավար գործիչների դատավարությունն է Կ. Պոլսում։ Մուդրոսի զինադադարի (1918) կնքումից անմիջապես հետո, համաշխարհային հասարակայնության ճնշման տակ, թուրքական նոր կառավարությունը որոշեց պատասխանատվության ենթարկել Թուրքիան պատերազմի մեջ ներքաշած և հայերի ցեղասպանությունը կազմակերպած մեղավորներին։
Դատավարության արձանագրությունները հրատարակվել են 1919-20 թթ., «Թաքվիմ-ի վեքայի» («Իրադարձությունների օրացույց») արաբատառ թուրքական պաշտոնաթերթի հավելվածում։ Երիտթուրքերի դատավարությունը թեև չստացավ լայն արձագանք, այնուամենայնիվ բացահայտեց Արևմտյան Հայաստանում և Օսմանյան կայսրության հայաբնակ վայրերում թուրքական իշխանությունների իրագործած հայերի ցեղասպանությունը։ Երիտթուրքերի դատավարության նյութերը հերքում են թուրքական պաշտոնական շրջանների՝ հայերի ցեղասպանությունը ժխտող պնդումները։
Ի՞նչ նպատակ է հետապնդում այս գիտաժողովը ու ժամանակակից հանցագործությունները դատապարտող դատավարությունների ի՞նչ մեխանիզմներ կարող են առաջարկվել այս գիտաժողովի արդյունքում. հեռախոսազրույց գերմանաբնակ իրավաբան, գիտաժողովի կազմակերպիչներից, հայ գերմանական փաստաբանական միության հիմնադիր Գուրգեն Պետրոսյանի հետ։
