Բելգիայի Անտվերպեն քաղաքի «Նուարդ» մշակութային միության հայկական կիրակնօրյա դպրոցի ուսուցչուհի Աննա Բարեղամյանը նշում է, որ հայ աշակերտներն ստանում են համապատասխան կրթություն, ունեն պատրաստված մասնագետներ, սակայն դասագրքերի հարցը անհանգստացնող է բոլոր ժամանակներում։
Բարսելոնայի հայկական մշակութային միության մեկօրյա դպրոցի տնօրեն Թամարա Կարապետյանի կարծիքով էլ, այսօր սփյուռքի դպրոցներին անհրաժեշտ են չափորոշիչներ և տեխնիկական միջոցների կիրառման հնարավորություններ։
«Երբ մենք հայ երեխային պատմում ենք պատմական մի իրադարձության մասին, ցանկալի է նաև նրան ինչ- որ ձևով ցույց տալ տեղանքը, պատմական վայրը։ Այդպես են անում հաճախ իսպանական դպրոցներում։ Հենց դա է պատճառը, որ իսպանական դպրոցներից հայկական դպրոցներ տեղափոխվող երեխաների համար մեր կրթությունը անհետաքրքիր է դառնում»,- ասում է նա։
Ինչպես Անտվերպենի կիրակնօրյայում, Բարսելոնայի մեկօրյա դպրոցն էլ շենքային պայմանների խնդիր ունի։ Դպրոցի հիմնադիր տնօրեն Թամարա Կարապետյանը շեշտում է, որ իրենց հաստատությունը ֆինանսավորվում է նաև ՀԲԸՄ կողմից։
«Այսինքն, եթե չլինեն սրտացավ հայեր, մեր դպրոցը կարող է փակվել»,- ասում է Թամարա Կարապետյանը, որը նաև դպրոցի հիմնադիրն է։
ՀՀ ԿԳՄՍ արտաքին կապերի և սփյուռքի վարչության սփյուռքի հետ կապերի բաժնի պետ Կարեն Մնացականյանը ընդգծում է, որ հենց այս օրերին չափորոշիչների մշակման հարցով դիմել են մանկավարժական համալսարան։ Հարցը քննարկման և բանակցությունների փուլում է։
«Կարևոր ենք համարում սփյուռքի դպրոցներում չափորոշիչների կիրառումը, դա և կհեշտացնի, և կտարանջատի կրթությունը։ Եվ նաև նոր որակ կհաղորդի մեր կրթությանը», — ասում է պաշտոնյան։
