Բավարար կամք, որպեսզի մեր երկիրը դնենք զարգացման անբեկանելի ռելսերի վրա. Նիկոլ Փաշինյան
Վարչապետ Նիկոլ Փաշինյանը ներկա է գտնվել Հայաստանի խորհրդարանի հիմնադրման 100-ամյա հոբելյանին նվիրված միջոցառմանը, որը տեղի է ունեցել Ազգային ժողովի բակում: Իր խոսքում վարչապետը, մասնավորապես, նշել է. «Հայաստանի Հանրապետության մեծարգո նախագահ, Հայաստանի Հանրապետության Ազգային ժողովի մեծարգո նախագահ, Արցախի Հանրապետության մեծարգո նախագահ, Վեհափառ Տեր, տիկնայք և պարոնայք, Այսօր մենք նշում ենք Հայոց խորհրդարանի կամ Հայոց խորհրդարանական ավանդույթի 100-ամյակը և սա նշանակալի իրադարձություն է, չնայած մի քանի հազար տարվա պետական ավանդույթ ունեցող ժողովրդի համար 100 տարին երևի թե և ակնհայտորեն այդքան շատ չէ:
Բայց այս 100 տարին շրջադարձային նշանակություն ունի մեր պետական գիտակցության համար, որովհետև ունենալ խորհրդարան որպես բարձրագույն օրենսդիր մարմին՝ նշանակում է, որ այլևս պետական կառավարման առանցքային շարժիչ ուժը ժողովրդի կամքն է, ժողովրդի ընտրությունը, ժողովրդի կամարտահայտությունը: Սա է որևէ պետությունում խորհրդարանի գոյության ամենակարևոր իմաստը, երբ ժողովուրդը հանդիսանում է իշխանության միակ, անփոխարինելի և բացառիկ աղբյուր: Այս առումով, մենք իսկապես մի կարևոր ժամանակաշրջան ենք թևակոխել, երբ ժողովրդի նոմինալ իշխանությունը վեր է ածվում նաև ժողովրդի իրական, դե ֆակտո իշխանության: Հայոց խորհրդարանների դերը երեք հանրապետությունների պատմության ընթացքում, իհարկե, հնարավոր չէ գերագնահատել, այդ խորհրդարաններն ունեցել են իրենց բացառիկ դերը, առավել ևս Հայաստանի առաջին հանրապետության պատմության մեջ և առավել ևս Հայաստանի երրորդ հանրապետության պատմության ընթացքում: Շատ կարևոր է արձանագրել, որ որևէ խորհրդարանի գործունեության արդյունավետության և լեգիտիմության կարևորագույն աղբյուրն իսկապես ժողովրդի կամքն է և խորհրդարանը պետք է արտահայտի այն տրամադրությունները, այն մտադրությունները, այն երազանքները, այն ընտրությունը, որ կատարում են Հայաստանի Հանրապետության քաղաքացիները:
Եվ ես, այս առումով, շատ կարևոր եմ համարում, որ Հայաստանի խորհրդարանները երբեք չունենան այնպիսի խնդիր, երբեք իրենց գլխավերևում չունենան այնպիսի հարցադրում, թե որքանով են այդ խորհրդարաններն արտահայտում ժողովրդի ընտրությունը և ժողովրդի կամքը: Սա կարևորագույն խնդիր է մեր իրականությունը և պետական կառավարման համակարգը սինխրոնացնելու, նույնականացնելու գործում, և ես համոզված եմ, որ մենք իսկապես որպես մի հանրություն, որպես մի պետություն, որպես մի ժողովուրդ, որ կարողացանք իրականացնել մարդկության պատմության համար աննախադեպ և բացառիկ քաղաքական հեղափոխություն, ի վիճակի կլինենք, այո, նաև Ազգային ժողովի նախագահի հնչեցրած սկզբունքների և մոտեցումների շրջանակներում լուծել այն խնդիրները, որոնք առկա են ներքաղաքական կյանքի ընթացիկ օրակարգում: