Տարվա այս եղանակին օձերն ավելի շատ են լինում ուշադրության կենտրոնում: Ինչքան տաք է լինում ամառը, օձերին տեսնելու վտանգն ավելի է մեծանում:
Սակայն, չնայած, և՛ ԱԻՆ—ից և՛ առողջապահության նախարարությունից փոխանցում են՝ նախորդ տարվա այս նույն ժամանակահատվածի համեմատ օձի խայթոցի դեպքերը նվազել են:
Օրերս Ծիծեռնակաբերդի հուշահամալիրի մոտ՝ ասֆալտի վրա, երեկոյան 22:00-ի սահմաններում չնկատեցի օձին։ Կողքիններս նկատեցին։ Պարզվեց թունավոր գյուրզա է:
Տարածքում երեխաներ կային նաև, որ խաղում էին խոտածածկ տարածքում։ Դեպքից հետո տարածքի աշխատակիցները փաստեցին, որ առաջին դեպքը չէ՝ օձեր են տեսնում: Այս տարի շատացել են՝ ասացին։
Սակայն, արտակարգ իրավիճակների և առողջապահության նախարարությունների փոխանցած տվյալներն այլ բան են ասում: Օձի խայթոցի դեպքերը նվազել են:
ԱԻՆ լրատվության պետ Գոհար Բաղդասարյանը խոսում է թվերով, համեմատություն անցկացնում՝ նախորդ տարվա նույն այս ժամանակահատվածի հետ պատկերն ավելի լավ ցույց տալու համար:
Մահվան ելքով օձի խայթոցի դեպք այս տարի չի գրանցվել:
2018 թվականի առաջին կիսամյակում ԱՆ ստացել է օձի խայթոցի մասին 38 հաղորդում, 2017 թվականի նույն ժամանակահատվածում գրանցվել է օձի խայթոցի 65 դեպք:
Այս տարի օձի խայթոցի առաջին դեպքն արձանագրվել է մարտի 5-ին, 2017 թվականին՝ ապրիլի 18-ին:
ԱՆ դիմում-բողոքների բաժնի գլխավոր մասնագետ Կարինե Հախումյանը օձի խայթոցի դեպքում խորհուրդ է տալիս որևէ քայլ չձեռնարկել՝ միայն շատ արագ հասնել մոտակա հիվանդանոց:
Օձի խայթոցից խուսափելու համար անհրաժեշտ է հետևել որոշ կանոնների.
- – այնպիսի վայրերում, որտեղ օձերի առկայության հավանակությունը մեծ է, պետք է հագնել երկարաճիտ կոշիկներ
- – անհրաժեշտ է ձեռքին ունենալ երկար փայտ` քայլելիս տեսադաշտը թփերից ազատելու և բացելու համար
- – հարձակման դիրք ընդունած օձ տեսնելու դեպքում պետք է կանգ առնել և դանդաղ, աննկատ ետ քաշվել:
Հանրապետության բժշկական կազմակերպություններն ապահովված են հակաթույնով, «օձի խայթոցն» ընդգրկված է անհետաձգելի բժշկական օգնություն պահանջող հիվանդությունների և վիճակների ցանկում և տվյալ բուժօգնությունը բնակչության բոլոր խմբերի համար իրականացվում է անվճար:
