Շանթի դպրոցում ուսուցիչը մեղադրում է տնօրենին, տնօրենը՝ հերքում
Կրթօջախից ստացված հերթական ահազանգի հետքերով է գնացել «Ռադիոլուր»-ը: Լևոն Շանթի անվան N4 դպրոցի ուսուցչուհի Անահիտ Թելունցն իր ֆեյսբուքյան էջում տնօրենի, իր ձևակերպմամբ, անօրինությունների դեմ բողոք- նամակ էր գրել:
Նա պնդում է, որ դպրոցի տնօրեն Արմենուհի Զուռնաչյանը բոլոր դասղեկներին հանձնել է 2018 թվականի սեպտեմբերի 1-ից դասղեկի աշխատանքի դիմաց հավելյավճար չտալու մասին ծանուցում։
Նամակում նշված է նաև, որ այս տարվա հունվարից արդեն իսկ այդ աշխատանքի դիմաց տրվող գումարը կրճատել են 3000 դրամով: Դպրոցի պատճառաբանությունը մեկն է՝ բյուջեն ունի ճեղքվածք և պետք են որոշ խնայողություններ:
Օրեր առաջ Շանթի անվան համար 4 դպրոցի տնօրեն Արմենուհի Զուռնաչյանը դասղեկներին տեղեկացրել է, որ աշխատանքային օրենսգրքի 113 և 115 հոդվածների համաձայն՝ կրճատվելու է դասղեկերի աշխատավարձը։ Ծանուցման մեջ նշված է, որ պայմաններին չհամաձայնելու դեպքում նրանք կարող են ազատման դիմում գրալ «Ռադիոլուրի» հետ զրույցում նշեց փոփոխությունների դեմ դժգոհող ուսուցչուհի Անահիտ Թելունցը:
Նա նաև բարձրաձայնեց, որ դասղեկի աշխատավարձի կրճատում արդեն մեկ անգամ տեղի ունեցել է հունվարին, որին ինքը մոտեցել է ըմբռնումով և ստորագրել պայմանագրի տակ: Հաջորդ փոփոխությունը նախատեսվում է 2018 թվականի սեպտեմբերին, որի վերաբերյալ դասղեկներն ստացել են ծանուցագիր, որի մասին Անահիտ Թելունցը գրել է իր ֆեյսբության էջում ու խնդիրը ստացել հանրային հնչեղություն:
Բարձրացրած խնդրին տնօրենը պատասխանել է, որ բյուջեով տրամադրվող գումարներից կրճատվել է 6 միլիոն դրամ և անհրաժեշտ է դասղեկի աշխատավարձերը նվազեցնել: Ուսուցիչուհու դժգոհությանը տնօրեն Արմենուհի Զուռնաչյանը պատասխանում է, որ կան դպրոցներ, որտեղ վաղուց դասղեկը հավելավճար չի ստանում:
Ուսուցչուհին հրաժարվել է ստորագրել տնօրենի ներկայացրած ծանուցագիրը, տնօրենն էլ այն ուղարկել է բնակարան: Դրանից հետո Անահիտ Թելունցը դժգոհել է, որ գնալու է խնդրի հետքերով և բողոքելու է ընդհուպ վարչապետին։ Ինչպես զրուցակիցս է փոխանցում, տնօրենն էլ հակադարձել է՝ ինչ ուզում ես արա:
Դպրոցի տնօրեն Արմենուհի Զուռնաչյանը մեկնաբանեց առաջիկայում նախատեսվող փոփոխությունները: Ըստ նրա՝ ներկայացված բյուջեն կրճատվել է 5 միլիոն դրամով, բայց 2017 թվականի հունվարից մինչև դեկտեմբեր ունեցել են նաև խնայողություններ, սակայն այդ խնայողությունները, ըստ տնօրենի, չի թույլատրվում օգտագործել աշխատավարձերի համար: Եվ որպեսզի աշխատողները հնարավորություն ունենան ավարտել տարին, նաև չեն կարող խզել արդեն կնքված պայմանագրերը, որոշել է հավելյալ աշխատանքների համար վճարում կրճատումներ անել:
Փաստաթղթերը ցույց են տալիս, որ դպրոցի տնօրենի, գլխավոր հաշվապահի, գրադարանավարի ու գիշերային պահակի հավելավճարները չեն կրճատվել: Մեր հարցին տնօրեն Զուռնաչյանը պատասխանեց.
«Հանրապետության մասշտաբով բոլոր տնօրեններին է տրվել հավելավճար, բացատրությունը, որ եթե չտրվի հավելավճար, ապա տնօրենը կստանա ավելի քիչ, քան փոխտնօրենը: Հավելավճարները տրվել են, որպեսզի պահպանվի այն ֆիքսված գումարը, որը եղել է 150 հազար դրամ, ասում է տնօրենը»:
Դժգոհող ուսոցչուհու շահերի պաշտպան Լիլիթ Սարգսյանն էլ նշում է, որ ծանուցման մեջ կան իրավաբանական խախտւմներ: Նշվել են հոդվածները, սակայն չեն նշվել փոփոխությունները:
«Կարող են լինել ժամկետների, աշխատավարձերի փոփոխություններ: Կա խորհրդի նիստով արձանագրված փոփոխությունների անցնելը»:
Ուսուցչուհու հաջորդ դժգոհությունը դպրոցի հոսանքալարերի համար ծնողներից գումարներ հավաքելն էր, հակառակ նրան, որ դպրոցի ուսուցչական ողջ կազմը պնդում է՝ դա արվել է ծնողների նախաձեռնությամբ: Դպրոցի տնօրենը բացատրում է՝ հոսանքալարերի խնդրից տեղյակ էին քաղաքապետարանում, սակայն արձագանքն ուշացել է, եւ երեխաների անվտանգության համար մտահոգ ծնողներն իրենք են առաջարկել հավաքել գումարները: Դրանից հետո եղել է դրամահավաքի մասին ահազանգ: Ահազանգի հետքերով եկել են քաղաքապետարանից. քաղաքապետարանն ու պահանջել բացատրագրեր: Տնօրենն էլ բացատրել է, որ ուշացել է քաղաքային իշխանության պատասախանը և հարցին լուծում են տվել ծնողները:
Ուսուցչուհի Թելունցի բողոքներին գումարվեց ևս մեկը: Վերջինս ուսուցչական ամբողջ կազմի մոտ հայտարարեց, որ դպրոցում ֆակուլտատիվ պարապունքների համար յուրաքանչյուր երեխայի համար տնօրենին վճարել է 3500 դրամ: Տնօրենը ասածը որակեց զրպարտանք:
Բանավեճին ներկա մյուս ուսուցչուհիները վեճի ընթացքում պաշտպանում էին տնօրենին և նշում, որ հավատում են իրենց առաքինի տնօրենին ու կասկածի տակ չեն դնում նրա քայլերը: «Ռադիոլուրը» հետևողական է լինելու գործընթացին և ակնկալում է նաեւ Երևանի քաղաքապետարանի պատասխանը: