Նախընտրական շրջանում եւս հակերային հարձակումներն ակտիվանում են, զգուշացնում է մասնագետը
Հասմիկ Դիլանյան
«Ռադիոլուր»
Որքան թեժանում են նախընտրական կրքերը, այնքան ավելի պետք է ուժեղացնել կայքերի անվտանգությունը: Հատկապես այս օրերին են հակերներն ավելի ակտիվանում: Հենց թեկուզ խորհրդարանական ընտրությունների փորձն աչքի առջև ունենալով ՏՏ մասնագետ Սամվել Մարտիրոսյանը հատկապես լրատվական կայքերին զգոնության կոչ է անում:
Փորձագետը կարծում է, որ անգամ, եթե որևէ կայք են կոտրում, ավելի նպատակահարմար է լռել դրա մասին, իսկ սա իր բացատարությունն ունի՝ ադմինիստրատորները գտնում են թույլ կետը, վերացնում այն, փորձում են ավելի պաշտպանված դարձնել այն:
Երբեմն նույն հակերային հարձակումները իրենց մեջ, այսպես ասենք, PR տարրեր են պարունակում, շատ հաճախ մասնագետները կայքերի գոյության մասին տեղեկանում են հակերային հարձակման ենթարվելուց հետո միայն:
2011-ին ավանդական հակերային հարձրակումներից բացի արագորեն սկսեցին զարգանալ այլ՝ DDOS հարձակումները, որոնց հեղինակին գործնականում դժվար է գտնել։
«Վարակված համակարգիչները սկսում են մեծ քանակությամբ կեղծ այցելություններ գեներացնել, ոչ ոք չի կոտրում կայք, բայց ինքը դառնում է անհասանելի: Հակերային սև շուկայում այդ տիպի հարձակումները շատ էժանացել են»,- ասում է մասնագետը։
Սամվել Մարտիրոսյանը հակերային հաձակումը բարբարոսություն է համարում։
«Իրականում բարբարոսություն է մտնել ավիրել ուրիշի գործն ու դուրս գալ։ Սովորեցնել մեր երիտասարդներին զբաղվել այսպիսի խուլիգանությունով, որպեսզի իրենց հայրենասիրությունը դրսևորեն , չեմ կարծում, որ այդքան էլ լավ է»,- ասում է նա։
Սովորաբար հարձակումներն ավելի մատչելի են, քան դրանց պաշտպանությունը։ Խոսքը մի քանի հարյուր դոլարի մասին է: Հայաստանում պետական կայքերը պաշտպանում է ԱԱԾ-ն, որից հետո, հաջողված հարձակում չի եղել:
Եվ քանի որ առաջիկայում ներքաղաքական կյանքում թեժ զարգացումներ են հասունանում, պետք է ավելի զգոն լինեն ոչ միայն լրատվական կայքերը, այլ՝ կառավարման մարմիններն ու քաղաքական ուժերը:
