Մեկնարկում է թիվ 1 և թիվ 35 ընտրատարածքներում թեկնածուների առաջադրման գործընթացը
Այսօր, հոկտեմբերի 8-ին մեկնարկում է Երևանի թիվ 1 և Շիրակի մարզի թիվ 35 ընտրատարածքներում մեծամասնական ընտրակարգով լրացուցիչ ընտրություններում թեկնածուների առաջադրման գործընթացը: Ընտրություններն այդ ընտրատարածքներում տեղի են ունենալու դեկտեմբերի 2-ին: Առաջադրման գործընթացը կշարունակվի մինչև հոկտեմբերի 18-ը, իսկ թեկնածուների գրանցման ժամկետը կսկսվի հոկտեմբերի 18-ից 28-ը: Քարոզարշավը նշված տեղամասերում կսկսվի նոյեմբերի 4-ից և կավարտվի նոյեմբերի 30-ին: Հիշեցնենք, որ 35 ընտրատեղամասում ընտրված պատգամավոր Սամվել Բալասանյանը ընտրվել է Գյումրիի քաղաքապետ, իսկ թիվ 1 ընտրատեղամասում ընտրված պատգամավոր Ռուբեն Հայրապետյանը հայտնի դեպքից հետո ինքնաբացարկ էր ներկայացրել: Երևանի թիվ 1 ընտրատարածքում Հանրապետական կուսակցությունը հայտարարել է, որ առաջադրում է Ռոբերտ Սարգսյանի թեկնածությունը, իսկ թիվ 35-ում՝ Արման Սահակյանի: Երևանի թիվ 1 ընտրաատրածքում իր առաջադրվելու մասին էին հայտարարել Ժառանգություն կուսակցության անդամ Ստյոպա Սաֆարյանը և լրագրող Արտակ Եղիազարյանը: Վերջինը սակայն, նախօրեին իր ֆեյսբուքյան էջում հայտարարեց, որ չի առաջադրվելու մի քանի պատճառներից դրդված, դրանցից մեկը՝ ըստ լրագրող Արտակ Եղիազարյանի ընտրություններին մասնակցելու համար լուրջ ֆինանսական միջոցների բացակայությունն է։