Ապրիլի 18-ին՝ Հուշարձանների և տեսարժան վայրերի միջազգային օրը, ՀՀ Գեղարքունիքի մարզի «Բերդկունք» («Սպիտակ բերդ») ամրոցում անցկացվելու է միջոցառում, որին ներկա են լինելու ՀՀ ԿԳՄՍ նախարար Ժաննա Անդրեասյանը և Եվրոպական միության դեսպանը։
Միջոցառումների մեկնարկը տրվելու է Հանրապետության հրապարակից՝ ժամը 12։00-ին։
«Եվրոպական ժառանգության օրեր» ծրագրի «Եվրոպական ժառանգության երիտասարդ կերտողներ» մրցույթի 11-17 տարեկան մասնակիցները շարժվելու են «Բերդկունք» ամրոց։
Պատմական հուշարձանի տարածքում նախատեսված է տեղեկատվական ցուցանակի տեղադրում, ծանոթություն և շփում երիտասարդների հետ, պատվոգրերի հանձնում։
«Բերդկունք» («Սպիտակ բերդ») ամրոցը բազմաշերտ հուշարձան է, թվագրվում է մ․թ․ա․ II–I հազ., վերակառուցվել և զարգացման բարձրակետին է հասել միջնադարում։
Բերդկունքի ամրոցի դիրքն այնքան գերիշխող է շրջապատի նկատմամբ, որ միջնադարում կիկլոպյան ամրոցի փլատակների վրա կառուցվել է մի նոր` ամրակուռ ամրոց, որի անունով էլ մինչ օրս այն կոչվում է «Սպիտակ բերդ» («Աղկալա», «Իշխանաց բերդ»):
Հուշարձանների և տեսարժան վայրերի միջազգային խորհրդի /ԻԿՕՄՕՍ/ առաջարկությամբ` ՅՈՒՆԵՍԿՕ-ն, 1983 թվականից, ապրիլի 18-ը նշում է որպես հուշարձանների և տեսարժան վայրերի միջազգային օր։
Նպատակն է բարձրացնել մարդկության իրազեկությունը պատմամշակութային ժառանգության մասին, անհրաժեշտ ջանքեր գործադրել հուշարձանների պահպանության և հանրահռչակման համար։
