Նիկոլ Փաշինյանը սեպտեմբերի վերջին կայցելի Նյու-Յորք
ՀՀ վարչապետ Նիկոլ Փաշինյանը սեպտեմբերի վերջին կայցելի Նյու-Յորք՝ մասնակցելու ՄԱԿ ԳԱ նստաշրջանի բացմանը։
Մինչ այդ՝ մի քանի օրից, սեպտեմբերի 14-15-ը ՀՀ վարչապետը կայցելի Փարիզ, նախատեսված է հանդիպում Ֆրանսիայի նախագահ Էմանուել Մակրոնի եւ Ֆրանսիայի հայ համայնքի հետ՝ լրագրողներին տեղեկացրել է ԱԳՆ մամուլի քարտուղար Տիգրան Բալայանը։
Նա անդրադարձել է նաև երեկ Տավուշում հակառակորդի կրակոցներին։ Իրավիճակը վերահսկելի է իր հերթին ավելացրել է ՊՆ Դավիթ Տոնոյանը:
«Ղարաբաղյան խնդրի կարգավորման հարցում արված իր հայտարարություններում ՀՀ վարչապետ Նիկոլ Փաշինյանը բավականին հետևողական է»-, «Ռադիոլուրին» ասաց ՀՀ ԱԳՆ Տիգրան Բալայանը՝ արձագանքելով Ադրբեջանի նախագահ Իլհամ Ալիևի հերթական անհեթեթ հայտարարությանը։ Ալիեւն ասել էր, թե իբր ՀՀ նոր վարչապետը ղեկավարման առաջին օրվանից հակամարտության կարգավորման հարցով հակասական հայտարարություններով է ներկայանում։
Ալիևը ԵԱՀԿ գլխավոր քարտուղար Թոմաս Գրեմինգերի հետ հանդիպման ժամանակ իր խոսքում նաև աննպատակահարմար է համարել յոթ շրջանները Լեռնային Ղարաբաղի Հանրապետության մաս կազմելու մասին Նիկոլ Փաշինյանի հայտարարությունը: Ալիևը այդ հայտարարությունը որակել է վտանգավոր և կոչ է արել ԵԱՀԿ-ին արձագանքել դրան, գրում է Ադրբեջանի նախագահի պաշտոնական կայքը:
«Կարդացի Ալիևի հայտարարությունը։ Ճիշտն ասած զարմացած եմ, թե որտեղ է նա հակասականություն տեսել: Պարոն Փաշինյանը իր հայտարարություններում բավականին հետևողական է ղարաբաղյան հիմնախնդրի վերաբերյալ, նույնիսկ մինչև ընտրվել է հնչեցրել այդ տեսակետները»:
Ալիևի ամենացնցող կարծիքն իհարկե այն է, որ Նիկոլ Փաշինյանն ամեն կերպ ձգտում է տապալել բանակցային գործընթացը: Նա հարկ է համարել սպառնալ, թե այդ դեպքում ամբողջ պատասխանատվությունը կընկնի հայկական կողմի և անձամբ Փաշինյանի վրա:
Բավականին հետաքրքրական է Ալիևի կոչը Հայաստանի ներքաղաքական իրավիճակի մասին։ Նա ԵԱՀԿ գլխավոր քարտուղարին կոչ է արել մի կողմ չքաշվի Հայաստանի ընթացիկ քաղաքական գործընթացներից, մասնավորապես, մեջբերեմ, «մարդու իրավունքների մասսայական խախտումների, քաղաքական հակառակորդների ձերբակալությունների և Հայաստանում նոր բռնապետական ռեժիմի հաստատման հարցերում»։
Զոհրաբ Մնացականյան-Էլմար Մամեդյարով հնարավոր հանդիպման մասին. Տիգրան Բալայանը նշում է, որ կա պայմանավորվածություն, առաջարկություն, որ հանդիպումը կայանա, բայց համաձայնեցված հստակեցումներից հետո։
Կա սահմանված ժամկետ, թե երբ է հայտարարվելու: Մինչ ԱԳ նախարարների հանդիպումը, հակառակորդը շարունակում է խախտել հրադադարի ռեժիմը։ Հերթականը գրանցվել է երեկ՝ ժամը 22:30-ին:
Ադրբեջանական զինուժը հրաձգային խոշոր զենքերից գնդակոծել է Տավուշի մարզի Բաղանիս գյուղը և գյուղով անցնող միջպետական ավտոճանապարհը։ Այն տեւել է 5-7 րոպե: Հակառակորդի թիրախում է հայտնվել նաև Տավուշի մարզի Վազաշեն համայնքը: Կրակոցները ոչ մի վնաս չեն հասցրել համայնքին, միայն երեխաներն են մի քիչ վախեցել՝ տեղեկացնում է Վազաշենի համայնքապետ Լորիկ Բադիրյանը:
ԱԳՆ-ն Տավուշում արձանագրված կրակոցների հարցում անհրաժեշտ գործողություններ կձեռնարկի՝ վստահեցնում է Տիգրան Բալայանը
«Առաջին հերթին ըստ նրա տեղեկացվում են կատարվածի մասին միջնորդները, այդ երկրների ԱԳՆ—ներն ու դեսպանները, ասաց նա, նաև ավելացնելով, որ հրադադարի ռեժիմի խախտումները մշտական բնույթ են կրում»:
Տավուշի մարզում գրանցված հրադադարի ռեժիմի խախտումներին անդրադարձել է նաև ՊՆ Դավիթ Տոնոյանը և վստահեցրել՝ իրավիճակը վերահսկելի է:
«Տավուշի մարզի Բաղանիս գյուղի գնդակոծման առումով այս պահին անհանգստանալու խնդիր չկա: Իրավիճակը կայուն է: Հրադադարի այդպիսի խախտումներ պարբերաբար են լինում, որոնց մեր զինված ուժերն արձագանքում են, և իրավիճակը կայունանում է: Անհանգստանալու խնդիր այս պահին չկա»:
Դավիթ Տոնոյանը նաև վստահեցրել է, որ ՀՀ ԶՈՒ համար առաջնահերթություն է բազմաֆունկցիոնալ ավիացիայի ձեռքբերումը: Ռուսաստանի հետ համագործակցությունը բավականին հաջող կերպով զարգանում է՝ ասում է նախարարը.
«Մենք կարևորում ենք բազմաֆունկցիոնալ ավիացիայի ձեռքբերումը և ներդրումը Զինված ուժերում, դա առաջնահերթություն է, այս պահին բազմաֆունկցիոնալ ավիացիայի ձեռքբերման շուրջ բանակցություններ են ընթանում: Խոսքը 100 միլիոն դոլարի ռազմական վարկային համաձայնագրի կնքման գործընթացի մասին է»:
ՊՆ խոստացել է լրագրողներին առաջիկայում լավ նորություն հայտնել Ադրբեջանում հայտնված հայ գերու մասին: