ՀՀ մանր և միջին գործարարներն այսօր կառավարության շենքի մոտ էին՝ պահանջում էին հանդիպում վարչապետ Նիկոլ Փաշինյանի հետ:
Վերջին շրջանում բախվել են լուրջ խնդիրների, ինչի պատճառով ոմանք արդեն երկընտրանքի առջև են՝ շարունակե՞լ զբաղվել բիզնեսով։
Խնդիրը կապված է մաքսազերծման գների բարձրացման հետ:
Արամայիս Խաչիկյանի ընտանիքն ավելի քան 20 տարի է զբաղվում է մանր և միջին բիզնեսով, բայց մի քանի օր է ապրանք չեն ներկրում, աշխատանքը կանգնել է:
Խնդիրը կապված է մաքսազերծման գների բարձրացման հետ:
Արամայիսի հետ մի քանի տասնյակ գործարարներ ևս այսօր իրենց խնդիրները բարձրաձայնելու էին եկել կառավարության շենքի մոտ:
Ասում են՝ կանգնել են լուրջ խնդիրների առջև, մինչև անգամ երկընտրանքի՝ շարունակե՞լ աշխատել, թե՞ ոչ:
Օրեր առաջ մանր և միջին գործարարները դիմել էին ԱԺ՝ խնդրին լուծում տալու համար:
Փոքր և միջին բիզնեսին ու ձեռներեցների խնդիրներով զբաղվող Համերաշխություն ՀԿ նախագահ Արմեն Ներսիսյանն ասում է՝ մաքսազերծման հստակ գին երբևէ չի գործել՝ տատանումները եղել են միշտ:
Այս խնդիրն առաջացել է գործարարներին օրենքի դաշտ վերադարձնելու հետ՝ պարզաբանում են պետական մարմինները: Մինչ այս պահը խնդրի վերաբերյալ Պետեկամուտների կոմիտեից մեկնաբանություն չի հնչել:
Իսկ մինչ այդ՝ տարբեր պետական կառույցներից մեր ունեցած տեղեկությունն այն է, որ սեպտեմբերին արդեն պատրաստ կլինի փոփոխված «Հարկային օրենսգրքի» նախագիծը:
Բողոքի ակցիայի մասնակիցները կվերադառնան կառավարության շենքի մոտ հինգշաբթի օրը՝ հույսով, որ կառավարության հերթական նիստին կբարձրաձայնվի նաև իրենց խնդիրը:
