Լուսինե Ավանեսյան
«Ռադիոլուր»-Ստեփանակերտ
Այսօր Արցախի Հադրութի շրջանի Տող գյուղում կազմակերպվել է Գինու թվով երրորդ փառատոնը: Նախաձեռնությունը ԼՂՀ էկոնոմիկայի նախարարությանն է, որը դրանով հնարավորություն է ստեղծում ինչպես տնային տնտեսությունների, այնպես էլ արտադրողների համար հանրությանը ներկայացնել ինչպես գինին, այնպես էլ գյուղացիական այլ արտադրանք, արտադրողի եւ սպառողի հանդիպման համար յուրօրինակ հարթակ հանդիսանալով:
Գինու փառատոնն արդեն ավանդաբար անցկացվում է Տողի Մելիք Եգանյանների պեղված ու վերականգնված ապրանքի բակում: Ընդարձակ ու գյուղական բարիքներով լեցուն տաղավարները, հյուրասիրությունն ու ազգագրական երգ –երաժշտությունն ամեն անգամ յուրահատուկ մթնոլորտ են ստեղծում:
ԼՂՀ էկոնոմիկայի փոխնախարար Սերգեյ Շահվերդյանի խոսքով` այս փառատոն -համտեսի առանձնահատկություններից մեկն այն է, որ որոշել են ներկայացնել նաեւ Արցախում գինու արտադրության պատմությունը:
Խորհրդային տարիներին արտադրված գինիների պիտակները հուշում են Ադրբեջանի Լեռնային Ղարաբաղում հայերի դուրսմղման քաղաքականության մասին, եթե մինչեւ 60 -ական թվականները պիտակները հայատառ էին, ապա 80-ականներին արտադրված գինիների վրա խմիչքի եւ արտադրողի անունը միայն ռուսերեն ու ադրբեջաներեն էր. հայկական խաղողի գինին սպառողին էր հասնում, որպես ադրբեջանական գինի:
Խորհրդային վերջին տարիները Արցախի գինեգործների համար դաժան տարիներ էին. արմատախիլ արվեցին խաղողի այգիները, արգելվեց թթի օղու արտադրությունը. այսօր հետզհետե արտադրությունները վերականգնվում են, տնայնագործական արտադրանքը ազատված է ակցիզային հարկից: Ամեն տարի գինու փառատոնը վեր է ածվում վայրի, որտեղ մարդիկ հանդիպում եւ փոխանակում են գիտելիքն ու արտադրանքը, ինչքան գինի է խմվում այդ օրվա ընթացքում , կազմակերպիչները չեն չափում:
Այսօր կազմակերպված գինու փառատոնի մասնակիցների շարքում նաեւ երկ Շուշիում տեղի ունեցած «Արցախ էթնոֆեստ. Երկրի համը» փառատոնի մասնակիցներն են, ովքեր եկել են Ֆրանսիայից, Ռումինիայից, Հարավային Կորեայից, Վրաստանից, Հայաստանից: Երեկ նրանք իրենց երկրների խոհանոցն են ներկայացրել: «Արցախ Էթնոֆեստ»-ը ԼՂՀ մշակույթի և երիտասարդության հարցերի նախարարության նոր միջազգային նախագիծն է:
Ինչպես Գինու փառատոնը, այնպես էլ «Արցախ էթնոֆեստը» ամենամյա կլինի: Ամեն տարի այն կնվիրվի ազգային մշակույթի մեկ ուղղության:
