Հայաստանը չի ստորագրել Շվեյցարիայում Ուկրաինային նվիրված գագաթնաժողովի ամփոփիչ հռչակագիրը
Հունիսի 15-16-ը Բուրգենշտոկում կայացած Ուկրաինայի հարցով գագաթնաժողովի ամփոփիչ փաստաթղթին աջակցել են ֆորումին մասնակցած 92 երկրներից 80-ը։
Միջոցառման կազմակերպիչները Բյուրգենշտոկի մամուլի կենտրոնի էկրաններին փակցրել են այն պետությունների ցանկը, որոնք հավանություն են տվել վերջնական հռչակագրին։ Փաստաթուղթը չեն ստորագրել BRICS-ի անդամները՝ Բրազիլիան, Հնդկաստանը, Հարավային Աֆրիկան, ԱՄԷ-ն, ինչպես նաև Հայաստանը, Բահրեյնը, Վատիկանը, Ինդոնեզիան, Լիբիան, Մեքսիկան, Սաուդյան Արաբիան, Սլովակիան և Թաիլանդը, գրում է ՌԻԱ Նովոստին։
Ուկրաինայի հարցով շվեյցարական գագաթնաժողովին մասնակցում են 92 երկրներ և 55 պետությունների ղեկավարներ, ինչպես նաև ութ կազմակերպություն, այդ թվում՝ ԵՄ-ն, Եվրոպայի խորհուրդը և ՄԱԿ-ը: Սակայն ԱՄՆ նախագահ Ջո Բայդենը, Չինաստանի նախագահ Սի Ցզինպինը, Բրազիլիայի նախագահ Լուիս Ինասիո Լուլա դա Սիլվան և շատ այլ պետությունների ղեկավարներ Շվեյցարիա չեն եկել։ Միջոցառման որոշ մասնակիցներ, ինչպիսիք են ԱՄՆ փոխնախագահ Կամալա Հարիսը և Գերմանիայի կանցլեր Օլաֆ Շոլցը, վաղաժամ հեռացել են:
Ռուսաստանը գագաթնաժողովին հրավիրված չի եղել։ Կրեմլն արձագանքել է դրան՝ ասելով, որ առանց Մոսկվայի մասնակցության ուկրաինական հակամարտությունը լուծելու ուղիներ փնտրելը բացարձակապես անտրամաբանական և ապարդյուն է։
Կիրակի ավելի վաղ Ուկրաինայի արտգործնախարար Դմիտրի Կուլեբան հայտարարել էր, որ Ուկրաինայի հարցով շվեյցարական գագաթնաժողովի վերաբերյալ հռչակագրի տեքստը պատրաստ է, հաշվի են առնվել Կիևի բոլոր սկզբունքային դիրքորոշումները։
