Մյասնիկյան համայնքը խոշորացումից հետո միավորվել է Արմավիրին: Մյասնիկյանում պետական բյուջեի համաֆինանսավորմամբ մի շարք ծրագրեր են իրականացվել: Նախորդ տարի 3 սուբվենցիոն հայտ է հաստատվել, որով նախատեսված աշխատանքները դեռ չեն ավարտվել, բայց գյուղին նոր փոփոխություններ են խոստանում: Մյասնիկյանի մանկապարտեզը հիմնանորգվել է համայնքի բյուջեի միջոցներով, սակայն դեռ չի ջեռուցվում, իսկ մշակույթի տան հիմնանորոգման համար զգալի միջոցներ են պահանջվում:
Մյասնիկյան գյուղի կենտրոնում առաջինը երևում է մշակույթի տունը, մինչդեռ արտաքին տեսքը պահպանած շինության ներսում անբարվոք վիճակ է, իսկ դահլիճը՝ ավերակ: Նախկինում այստեղ մշակութային շատ միջոցառումներ են կազմակերպվել, ֆիլմեր ցուցադրել: Գյուղի տարեցներն են հիշում.
«Ինչ ասեմ՝ ինչ կա, սա է: Նախկինում համերգներ են եղել այստեղ, բայց արդեն 25-30 տարի այս վիճակն է՝ սովետը փլուզվեց, սա էլ հետը: Մեկ-մեկ համերգ էր լինում, թենիս ու բիլիարդ կար՝ վերացան»:
Երկհարկանի մշակույթի տան տանիքը 2 տարի առաջ քամին վնասել էր, պետբյուջեի միջոցներով այն հիմնանորգվել է շենքի փլուզումը կանխելու նպատակով: Հիմա ներսում մասնակի վերանորոգման աշխատանքներ են՝ ասում է նախկին համայնքապետարանի աշխատակիցը.
«Հատակը սալիկապատում են, հետո տեղադրելու ենք գրադարակները, իսկ մյուս սենյակում լինելու է լամինատե հատակ, պատուհաններն էլ ենք փոխելու»
Մշակույթի տան մի հատվածում պարի ստուդիա է: Այստեղ շուրջ 50 երեխա է հաճախում: Ստուդիային տրամադրված սենյակը փոքր-ինչ վերանորոգված էր․ պարուսույց Սուսաննա Գևորգյան.
«Ստուդիան մոտ 1 տարի է՝ ինչ գործում է, մենք հովանավոր ունեինք, վերանորոգել ենք, իսկ համայնքապետարանը փոխելու է պատուհաններն ու դուռը»:
Մշակույթի տան դռներն ու պատուհանները փոխվելու են համայնքի բյուջեի միջոցներով, իսկ դահլիճի վերանորոգումը մեծ ծախսեր է պահանջում:
2021թ-ից Մյասնիկյան գյուղում սուբվենցիոն 3 ծրագիր է իրականացվում՝ մշակույթի տան մասնակի նորոգում, գլխավոր՝ Մոնե Մելքոնյանի անվան փողոցի ասֆալտապատում և մանկապարտեզի ցանկապատում: 3 ծրագրից միայն 900գծմ փողոցի ասֆալտապատումն է ավարտվել: Կոտայքի Ճանշին ընկերության Բաղրամյանի տեղամասի պետ Սլավիկ Գալստյանը ներկայացնում է աշխատանքը, որն արվել է 2 ամսվա ընթացքում.
«Հիմքի քանդում, վերականգնում, խճաքարի տեղադրում, արհեստական կառույցների ՝ դիտահորերի վերականգնում և ասֆալտբետոնյա շերտի կառուցում»:
Սուբվենցիոն մյուս ծրագրերը դեռ ընթացքի մեջ են, կավարտվեն այս տարվա ընթացքում: Վերջին տարիներին համայնքի բյուջեի միջոցներով աստիճանաբար վերանորոգվել ու նոր տեսք է ստացել 53-ամյա մանկապարտեզը: Այստեղ 4 խումբ է գործում, բայց միայն 4-5 ամիս: Ջեռուցման պատճառով մանկապարտեզ հաճախող 120 երեխաները տարվա մեծ մասը մնում են տանը: Տնօրեն Անահիտ Հարությունյանը խնդրում է աջակցել.
«Հույս ունենք՝ ջեռուցում կլինի, և մենք ամբողջ տարին կաշխատենք: Խնդրում ենք պատկան մարմիններին մեզ օգնել այս հարցում: Շատ մեծ նշանակություն ունի, որ մանկապարտեզը երկար ժամանակ աշխատի: Գոնե աշխատեինք մինչև նոյեմբերի 15-ը և բացենք մարտի 15-ից․ ամենաքիչը՝ 9 ամիս»:
Մանկապարտեզը կահավորված է: Պետբյուջեի համաֆինանսավորմամբ կառուցվել է ցանկապատ, իսկ մարզի հրատապ խնդիրների լուծման ծրագրով՝ սանհանգույց: Կառուցապատող ընկերության տնօրեն Միսակ Խլղաթյանը նշում է, որ ցրտերի պատճառով բազալտե քարերով սալիկապատումը չեն ավարտել.
«Եղանակի խնդիրն է, ջերմաստիճանը մինուս է և չենք կարող, տեխնոլոգիան թույլ չի տալիս բազալտապատենք»:
Արմավիրի մարզպետ Էդվարդ Հովհաննիսյանը, հետևելով սուբվենցիոն ծրագրերով իրականացվող աշխատանքներին, որոշակի թերություններ է նկատել.
«Խնդիրներին մենք դեռ ժամանակ կունենանք անդրադառնալ: Շինարարական աշխատանքներն առանձնահատուկ բնույթ ունեն, և ժամկետերի մասով որոշակի թերացումներ եղել են, բայց, կարծում եմ, մեր շինարարները դա կլրացնեն »:
Մյասնիկյանում համայնքի բյուջեի միջոցներով բազմաբնակարան շենքերի մուտքերում պատուհաներններ ու փականներով երկաթե դռներ են տեղադրվել: Բազմաբնակարան 4 շենք գազիֆիակցվել է: Համայնքի նախկին ղեկավար Տիգրան Բաղդասարյանն ասում է, որ մասնակի փոխվել են նաև խմելու ջրագծերը.
«Մենք ջրագիծ ունենք, որ «Վեոլիաջուր» ընկերությունն է սպասարկում. քիչ-քիչ փոխում է, մենք էլ վրան կանենք, ճանապարհների հարցն է մնում: Խողովակները շատ վատ վիճակում էին , փոխվելուց հետո ջուրը շատ է գալիս՝ երկար ժամանակով, ջրի ճնշումը մեծացել է»:
Մատակարարված խմելու ջուրն օգտագործվում է միայն կենցաղային նպատակով, իսկ խմելու ջուրը գնում են ցիստեռնից: Համայնքի բնակիչները գնահատում են գյուղում իրականացվող աշխատանքներն ու առաջարկում.
«Մեր փողոցն ասֆալտապատել են, մանկապարտեզն են սարքել ու ջրագծերն են փոխել: Թալինի ջուրը բերում ծախում են, այդ ջրագծերն էլ որ բերեն, լավ կլինի, խմելու ջուրն առնում ենք»:
Մյասնիկյան գյուղը խոշորացման արդյունքում միավորվել է Արմավիր համայնքին: Համայնքի նախկին ղեկավարը լիահույս է, որ գյուղում սուբվենցիոն ծրագրերը դեռ կշարունակվեն, ու այն ավելի բարեկարգ կդառնա։
