Ակնկալվում է, որ ԱՄՆ նախագահ Ջո Բայդենը պաշտոնապես կճանաչի Օսմանյան կայսրության կողմից Առաջին աշխարհամարտի ընթացքում հայերի կոտորածը որպես ցեղասպանություն, հաղորդում է Reuters-ը:
Բայդենը, հավանաբար, պատրաստվում է օգտագործել «ցեղասպանություն» բառը՝ որպես ապրիլի 24-ին հայտարարության մաս, երբ ամբողջ աշխարհում զոհերի հիշատակի ամենամյա հիշատակի միջոցառում է անցկացվում, հայտնում է թեմային ծանոթ երեք աղբյուր:
«Որքան ես հասկանում եմ, Բայդենը որոշում է կայացրել և կիրակի օրը իր հայտարարության մեջ օգտագործելու է ցեղասպանություն բառը», — ասել է աղբյուրը: Նրանք նախազգուշացնում են, որ հաշվի առնելով Թուրքիայի հետ երկկողմ կապերի կարևորությունը, Բայդենը, միևնույն է, կարող է որոշել վերջին րոպեին չօգտագործել այդ տերմինը:
Չորեքշաբթի օրը Սպիտակ տան մամուլի քարտուղար Ջեն Փսակին լրագրողներին ասել է, որ Սպիտակ տունը շաբաթ օրը, ամենայն հավանականությամբ, «ավելին կասի», բայց հրաժարվել է մանրամասներ փոխանցել:
Մեկ տարի առաջ, նախագահի թեկնածու Ջո Բայդենը, ոգեկոչելով Հայոց ցեղասպանության 1.5 միլիոն զոհերի հիշատակը, հայտնել էր, որ կաջակցի այդ սպանությունները որպես ցեղասպանություն ճանաչելու ջանքերին:
«Այսօր մենք հիշում ենք Մեծ Եղեռնում հայ ժողովրդի դիմագրաված վայրագությունները` Հայոց ցեղասպանությունը: Ընտրվելու դեպքում ես խոստանում եմ սատարել Հայոց ցեղասպանությունը ճանաչող բանաձևին և կդարձնեմ մարդու համընդհանուր իրավունքները գերխնդիր»,- Twitter-ում մեկ տարի առաջ գրել էր Բայդենը։
