Կարեն Ղազարյան
«Ռադիոլուր»
Ազգային, ավանդական երգի ու պարի պահպանումն ու հանրահռչակումը «Գութան» ամենամյա փառատոնի հիմնական առաքելությունն է: Փառատոնի մեկնարկին ընդառաջ հրավիրված այսօրվա ասուլիսում հիմնադիրն ու մասնակիցները ազգային եգի եւ պարի երկրպագուներին հիանալի տոն են խոստացել պարգեւել: «Գութան» ազգագրական երգի-պարի ամենամյա փառատոնն իրականացվում է 2014 թվականից: Այն ազգային մշակույթը ճիշտ ներկայացնելու կարևոր նախաձեռնության համարում է ստացել: Գերնպատակը հայ ազգագրական երաժշտարվեստի՝ երգարվեստի և պարարվեստի պահպանում, տարածում ու սերնդեսերունդ փոխանցումն է:
Ավանդական դարձած համատեղ կատարմամբ, ըստ էության, տրվեց «Գութան 2019» ազգագրական երգ ու պարի փառատոնի մեկնարկը: Այն այս տարի նվիրված է Կոմիտաս վարդապետի 150-ամյակին:
«Կարծում եմ, որ Կոմիտասը, դա անձ չէ, դա գաղափարախոսություն է, դա ազգային ինքնությունը պահելու հզոր գաղափարախոսություն է, որին ուզում ենք մենք ծառայել, ուզում ենք գնալ այդ ճանապարհով»:
Փառատոնի նախօրյակին հրավիրված
ասուլիսում հիմնադիր, վաստակավոր արտիստ Արսեն Գրիգորյանի պարզաբանումն էր: Նա համոզմունք
հայտնեց, որ «Գութանը» կայացած է, քանի որ
այն համախմբել է բոլոր նրանց, ովքեր իրենց խնդիրն են համարում ազգային
ինքնության, մշակույթի պահպանումը: Այդ նպատակի առումով էլ հավելեց.
«Ես կարծում եմ, որ 5-6 տարվա ընթացքում մենք կարողացանք
սեր եւ միասնականություն ունենալ: Կարծում եմ, որ հիմնականում մեր խնդիրը դա է»:
«Գութան» ազգագրական երգի-պարի ամենամյա փառատոնն այս տարի հիանալի տոն կպարգևի ազգային երգ ու պարի երկրպագուներին: Փառատոնին հնարավորություն կունենանք վայելել ժամանակի ազգագրական լավագույն 20 խմբերի ելույթները: «Նուբար» խմբի հիմնադիր-ղեկավար, Հանրային ռադիոյի «Արմատներ» երաժշտական հաղորդման խմբագիր Լուսինե Նազարյանը կարեւորում է այս հարթակը հատկապես այն առումով, որ այստեղ հին ու նոր խմբեր են հնարավորություն ստանում մեր հանրությանը ներկայացնելու մեր ավանդական մաքուր երգն ու պարը:
«Գութանն անցյալն ապագայի հետ կապող կամուրջը եղավ: Եթե անցյալի հետ կապը կորցնենք, մենք չգիտենք, թե ո՞ւր ենք գնալու վաղը»:
Փառատոնում կենդանի հնչողությամբ կներկայացվեն
գործեր մաքրամաքուր տարբերակով՝ Կոմիտասի ու նրա գործը շարունակողների կողմից փրկված
պատառիկներ: Գութանը նպաստել ու նպաստելու է հայ մաքուր երգի ուսուցմանն ու
տարածմանը՝ որպես արդյունք արձանագրեց «Գորանի» ավանդական երգի-պարի խմբի ղեկավար
Զավեն Թագակչյանը.
«Գութան»-ը էս հարցում էլ բավական մեծ դեր է կատարել, որ
ազգայինը ներկայումս առաջնային է՝ չնայած, իհարկե, հանրապետությունում կան
բազմաթիվ այլ երաժշտական գործունեություն ծավալած երեւույթներ, որոնք խաթարում են
մեր ազգայինը եւ վնասում: «Գութան»-ը դրանց դեմ դուրս եկած մեծ պատվար է, որը տալիս է հիանալի արդյունք»:
«Ակունք» ազգագրական խմբի հիմնադիրներից
Սարգիս Բաղդասարյանին ոգեւորում է այն հանգամանքը, որ մեծ է հետաքրքրությունը
«Գութան»-ի նկատմամբ եւ շարունակվում է այն գործը, որ սկսել էր իր սերունդը, որ
բախտ է ունեցել նաեւ անմիջապես առնչվել էրգրից գաղթածների հետ.
«Նրանք ստեղծել էին, պահպանել էին եւ պահում էին իրենց մեջ ու բերեցին հասցրեցին …
Բոլորին է հայտնի, թե ինչ մեծ հետաքրքրություն կա ժողովրդի կողմից այդ ամենի
նկատմամբ»:
Փառատոնի ընթացքում ցուցադրվելու են նաև մեր անցյալի հայ երգի ու պարի երախտավորների կյանքին ու գործին վերաբերող ֆիլմեր՝ արժևորելով նրանց ծավալած գործունեությունն ու մեզ փոխանցած ավանդը: