Քաղաքական

Ադրբեջանը շարունակում է իր սպառնալի հայտարարությունները

Երեկ Արցախի Հանրապետության ՊՆ մամուլի ծառայությունը հայտնել էր, որ ՊԲ մարտական պատրաստության 2018 թ. պլանի համաձայն՝ սեպտեմբերի 25-28-ը մարտական ինքնաթիռների ու ուղղաթիռների ընդգրկմամբ ՊԲ ավիացիան իրականացնելու է ուսումնամարզական շրջաթռիչքներ: Սրան այսօր արձագանքել է Ադրբեջանը՝ սպառնալով կործանել հայկական ռազմական ինքնաթիռներն ու ուղղաթիռները:

 

Ադրբեջանի պաշտպանության նախարարության՝ այսօր տարածած հայտարարությունում նշվում է, թե Հայաստանի ռազմաքաղաքական ղեկավարությունը «հերթական սադրիչ գործողություններն է ձեռնարկել»՝ տեղեկություն տարածելով Լեռնային Ղարաբաղում ռազմական ավիացիայի ներգրավմամբ ուսումնական թռիչքներ իրականացնելու վերաբերյալ:

Ադրբեջանի պաշտպանության նախարարության մամուլի ծառայության տարածած հայտարարության մեջ նշվում է, մեջբերում.

«Պաշտպանության նախարարությունը հայտարարում է, որ հակառակորդի ցանկացած օդային փոխադրամիջոց, որը կփորձի մոտենալ ադրբեջանական բանակի ստորաբաժանումների առաջատար դիրքերին, անմիջապես կչեզոքացվի: Հնարավոր կորուստների համար ամբողջ պատասխանատվությունը կկրի Հայաստանի ռազմաքաղաքական ղեկավարությունը»:

Ադրբեջանական հարցերով փորձագետ Տարոն Հովհաննիսյանը մեզ հետ զրույցում նկատեց, որ Ադրբեջանի ՊՆ-ի հայտարարության սպառնալից ոճն  ակնհայտ է եւ այն նորություն էլ չէ:

«Սա կարող ենք դիտարկել վերջին շրջանում լարված իրադրության ֆոնին, այդ թվում՝ երկրների ղեկավարների հայտարարությունների մակարդակով լարվածության»:

Չենք կարող ասել, Ադրբեջանը խոսքից գործի կարող է անցնել, թե ոչ, բայց զգուշանալն էլ վատ չէր լինի՝ հավելեց փորձագետը՝ հիշեցնելով 2014 թվականին տեղի ունեցած նույնպիսի զորավարժության ընթացքում Ադրբեջանի կողմից հայկական ուսումնամարզական թռիչք իրականացնող ուղղաթիռի խոցման փաստը:

Տարոն Հովհաննիսյանը կարծում է, որ նման հայտարարություններին որոշակի արձագանք պետք է լինի:

«Բոլոր իրավունքներն ունի հայկական կողմը, քանի որ սա /Ադրբեջանի հայտարարությունը/ փաստացի սադրանք է»:

Ի դեպ, Տարոն Հովհաննիսյանն ասաց, որ ադրբեջանական հասարակությունը մեծ ոգեւորությամբ է ընդունում իր ղեկավարության նման ագրեսիվ ու սպառնալից ոճով ցանկացած հայտարարություն:

Ադրբեջանի այս հայտարարությունը ոչ այլ ինչ է, քան ահաբեկչության հերթական դրսեւորում՝ մեզ հետ զրույցում ասաց ԱՀ նախագահի մամուլի խոսնակ Դավիթ Բաբայանը: Մենք երբեւիցե Ադրբեջանի օդային սահմանը չենք խախտել մեր զորավարժությունների ժամանակ՝ շեշտեց նա՝ հավելելով նաեւ, որ հենց Բաքուն է անընդհատ փորձեր կատարում ե՛ւ օդային, ե՛ւ ցամաքային սահմանը խախտելու՝ դիմելով տաբեր ահաբեկչական գործողությունների:

«Մենք երբեւիցե չենք խախտում սահմանը՝ ոչ թե նրա համար, որ վախենում ենք, կամ՝ հնարավորություն չունենք դա անելու: Պարզապես այդպիսի ահաբեկչական քայլերը մեր աշխարհընկալմանն ու քաղաքակրթությանը դեմ է: Ինչ վերաբերում է Ադրբեջանի նմա հայտարարություններին, ապա՝ պետք է ասենք, որ մենք շարունակելու ենք մեր զինավարժությունները՝ նախատեսված ամբողջ ծավալով»:

Եթե Ադրբեջանը դիմի արկածախնդրության, ահաբեկչական ցանկացած գործողության՝ մենք այդ բոլոր փորձերը կանխելու եւ չեզոքացնելու ենք՝  եզրափակեց ԱՀ նախագահի մամուլի խոսնակը:

 

Ցուցադրել ավելի
Back to top button