Հայաստան- Վրաստան միջպետական ճանապարհի Իջևանի հատվածն արդեն բաց է։ Երեկ ուշ ժամին այս ճանապարհահատվածի երթևեկությունը կաթվածահար էր: Հաղարծին և Թեղուտ համայնքների բնակիչները փակել էին ճանապարհը՝ պահանջելով, որ «Դիլիջան» ազգային պարկը հսկող կամավոր բնապահպանները հեռանան:
Օրեր առաջ բնակիչների ու բնապահպանների միջև ընդհարում էր տեղի ունեցել։ որը վերածվել էր ծեծկռտուքի: Այսօր արդեն Տավուշի մարզպետը Հաղարծին և Թեղուտ համայնքների վարչական ղեկավարներին իր մոտ է հրավիրել՝ ստեղծված իրավիճակը քննարկելու համար:
Բնապահպան, լուսանկարիչ Հայկ Բարսեղյանն ասում է, որ իրենք որևէ խնդիր չունեն գյուղացիների հետ, բայց իրենք այնտեղ են մի պատճառով, որպեսզի թույլ չտան անտառահատում իրականացնել:
Նկարը՝ Հետք-ի
Հայկ Բարսեղյանն ասում է, որ վերահսկող մարմիններն իրենց պարտականությունները չեն կատարում։ Բնապահպաններն իրենց գործողությունները դադարեցրել են, որի համար կան հիմնավոր պատճառներ:
Տավուշի մարզպետ Վահե Ղալումյանը, ով երեկ երեկոյան դեպքի վայրում էր, «Ռադիոլուրի» հետ զրույցում նշեց, որ լարվածությունը փոքր-ինչ թուլացել է, գյուղացիների պահանջը մեկն է՝ բնապահպանները պետք է հեռանան տարածքից:
Բնապահպաններն ասում են, որ բոլորի համար էլ պարզ է՝ ինչու են այս աղմուկը տեղացիները բարձրացրել՝ իրենք ծառ հատելուց զրկվում են, և բիզնես շահն է այստեղ գործում: Մարզպետին փոխանցում եմ բնապահպանների մտահոգությունները:
Վահե Ղալումյանի խոսքով՝ անտառը պետք է պահպանեն պետության կողմից ստեղծված կառույցները՝ անտառտնտեսությունը, ազգային պարկերը, բանապահպանական տեսչությունը, ոստիկանությունը։ Սակայն նման իրավիճակի պատճառը, ըստ նրա, որոշ կառույցների թերացումներն են:
Թե ինչպիսի հանգուցալուծում կստանա անտառային թնջուկը, դժվար է ասել: Քննարկումները դեռ շարունակվում են, այս պահին անտառում ծառեր չեն հատվում, ճանապարհն էլ բաց է:
