Քննիչն այսօր եղել է պոլիկլինիկայում՝ երեխայի մահվան հետքերով
5 ամսական Էվելինա Գրիգորյանի մահվան լուրը մեծ աղմուկ է բարձրացրել: Ծնողները պնդում են, որ երեխայի մահը բժիշկների կողմից թույլ տված սխալների արդյունք է: «Հերացի» թիվ 1 հիվանդանոցային համալիրի պոլիկլինիկայից էլ նշում են, որ պետք է սպասել դատաբժշկական փորձաքննության արդյունքներին:
Պատվաստումները կատարվել են ճիշտ պայմաններում, երեխայի վիճակը թույլ է տվել ստանալ վակցինան՝ պնդում են: Առողջապահության նախարարությունից և «Արաբկիր» բժշկական կենտրոնից, որտեղ գրանցվել է երեխայի մահը, այժմ չեն մեկնաբանում՝ քննությանը չմիջամտելու պատճառաբանությամբ։
Երեխայի մահվան պատճառների վերաբերյալ դժգոհությունների հետքերով է գնացել «Ռադիոլուրը»:
5 ամսական Էվելինա Գրիգորյանի մոտ ծնվելուց 2 շաբաթ անց նկատվել է ցան: Հերացու անվան մանկական պոլիկլինիկայում գրանցված փոքրիկին սպասարկող բժշկուհու՝ Ռուզաննա Կճոզյանի նշանակումները, հոր՝ Նարեկ Գրիգորյանի խոսքով, դրական ազդեցություն չեն ունեցել:
Այնուհետև Արաբկիր մանկական պոլիկլինիկայում կատարված լաբորատոր հետազոտությունները ցույց են տվել, որ ալերգիայի նկատմամաբ զգայունությունը երեխայի մոտ բարձր է: Ալերգիայի հետևանքով Էվելինայի առաջին պատվաստումը հետաձգվել է: Հաջորդ այցելությունը նշանակվել է մայիսի 5-ին: Ծնողները պահանջել են արյան անալիզ հանձնել, սակայն բժշկուհին ասել է, որ երեխայի ալերգիկ վիճակը հակացուցված չէ պատվաստում կատարելու համար եւ պատվաստել են:
«Երեք օր երեխան ջերմում էր, անհանգիստ էր, նույն այդ դեղերի միջոցներով, բերեցինք հասցրեցինք, այնպես որ երեխան այլևս գանգատներ չուներ»:
Հաջորդ պատվաստումը նշանակվել է հունիսի 5-ին: Նարեկ Գրիգորյանի խոսքով՝ պատվաստումից մի քանի օր առաջ երեխայի մոտ նկատվել է քրտնարտադրություն, վարքագծի փոփոխություն, գլխի հետնամասում փոքրիկ գոյացություն: Հունիսի 5-ին այցելել են «Հերացի» թիվ 1 հիվանդանոցային համալիրի պոլիկլինիա, երեխային սպասարկող բժշկուհին արձակուդում է եղել և Էվելինային սպասարկել է այլ մանկաբույժ Սուսաննա Սերգեեւնան:
«Ընտանեկան բուժքույր Սուսաննա Մնացականյան այդ բոլոր մեր մտահոգությունները, նույնիսկ հայտնեցինք, որ ցանկություն ունենք երկրից մեկնել, եթե հնարավոր է մեզ ինչ որ թուղթ տա, որպեսզի մենք Ռուսաստանում ներկայացնելով երեխան անցնի պատվաստում և բաց չթողնի այդ ամեն ինչը: Նա պատճառաբանելով, որ դա բավականին երկար թղթաբանություն է: Թե բա եկել եք, եկեք պատվաստեմ»:
Մինչ պատվաստելը, երեխայի ջերմությունը եղել է 36.9աստիճան: Ծնողի պնդմամբ, երեխայի ջերմությունը ևս մեկ անգամ չափվել է արդեն էլեկտրական ջերմաչափով, որը ցույց է տվել 36.4, որից հետո բժիշկը կատարել է պատվաստումը: Պատվաստումից ժամեր անց, հոր պնդմամբ, երեխայի մոտ կտրուկ փոխվել է տրամադրությունը, դարձել է ավելի անհանգիստ: Հաջորդ օրը բուժքույը հեռախոսազանգով է հետաքրքրվել երեխայի վիճակով: Մոր փոխանցած խոսքերը, որ երեխան առատ քրտնարտադրություն ունի, չունի ախորժակ և շատ անհանգիտ է, բուժքույրը պատասխանել է, որ նկարագրածը հետպատվաստումային երևույթներ են:
«Ամսի 6-ից 7-ը երեխաս ընդհանրապես չի քնել, լաց, հևոց, ինչ որ անհանգստություն, այնպես որ չի թողել նույնիսկ ձեռքներիցս իրեն ցած դնենք: Ժամը 12-ին մոտենալով Հերացու անվան պոլիկլինիկա, մոտենալով նույն Սուսաննա Սերգեեվնա բժշկին ցույց ենք տալիս երեխա արդեն սփրթնած, նա շոշափում է ականջն ու ասում տարեք ԼՕՌ-ի մոտ»:
Սակայն քիթ-կոկորդ-ականջի մասնագետը տեղում չի լինում: Պոլիկլինիկայի տնօրենը գործուղման է եղել արտերկիր, իսկ պաշտոնակատարն ու նրան փոխարինողը կրկին տեղում չեն լինում: Ծնողների բարձրացրած աղմուկից հետո ներկայանում է ԼՕՌ մասնագետը։ Նարեկ Գրիգորյանի փոխանցմամբ՝ կրկնում է նույնը, ինչ ասել էր երկու ամսի առաջ՝ աջ ականջում բորբոքում կա, իսկ կոկորդի կարմրություն շատ լացի արդյունք է: Սուսաննա Սերգեեվնան էլ անհանգստությունը կապել է փորիկի հետ և բուժման եղանակ նշանակել արդուկած շորը: Անհանգստացած ծնողները տեղափոխում են երեխային «Արաբկիր» բժշկական կենտրոն:
«Էխոյի միջոցով հասկանում են, որ երեխայի սիրտն ունի մոտ 5 տոկոս զարկ, անմիջապես տեղափոխում են վերակենդանացման բաժանմունք, որտեղ 10 րոպե անց մահանում է»:
«Ռադիոլուրը» այցելեց պոլիկլինիկա: Այցի պահին բուժհաստատությունում էր քննիչը, որը եկել էր ծանոթանալու պատվաստանյութերին ու պատվաստում կատարելու պայմաններին: Ինձ ընդունեց տնօրեն Աննա Բալյանը: Սուսաննա Սերգեեվնան արձակուրդում էր: Նրա հասցեին հնչած մեղադրանքները տնօրենը չի ընդունում, մատնանշում է ընտանեկան բժշկի մասնագիտական հմտությունները: Երեխային ամեն պատվաստումից առաջ համապատասխան զննում իրականացվել է և որևէ խնդիր չի հայտնաբերվել:
«Կան հիվանդություններ, կան արագընթաց հիվանդություններ, որոնք ժամկետի առումով համընկնում են պատվաստումից հետո ժամանակահատվածի հետ: Բայց դա չի նշանակում, որ դա պատճառ է»:
30 տարվա մանկաբույժի փորձ ունեցող Աննա Բալյանը զրույցի ընթացքում հուզվում էր, ես նույնպես երեխա եմ կորցրել, հասկանում եմ, ծնողների վիշտը, սակայն պետք է լինել օբյեկտիվ՝ ասում է.
«Սա առեղծվածային պատմություն է և անհամբեր սպասում եմ, թե իրականում ինչ կատարվեց երեխայի հետ: Արդյո՞ք սրընթաց բան եղավ, որ բժիշկը կարող էր չնկատել: Բայց այս պահին չեմ կարող և՛ շտապել մեղադրել, և՛ արդարացնել»:
Սա բժշկական սխա՞լ էր, թե՞ ոչ, պարզ կլինի հետաքննության ընթացքում՝ ասում է Աննա Բալյանը: Իսկ երեխայի հայրը՝ Նարեկ Գրիգորյանը, մեղադրում է սպիտակ խալաթը կրողներին, դժգոհում առողջապահության նախարարության թեժ գծից, որին պարբերաբար ներկայացրել է դեպքերի զարգացումը, սակայն որևէ պատասխան չի լսել, բողոքում նաև «Հերացու» անվան պոլիկլինիկայի բոլոր այն բժիշկներից, որոնց մասնագիտական, իր ձևակերպմամբ, տգիտության արդյունքում, կորցրել են իրենց երեխային: