Լուսաձորցիները ոգեւորված են թավշյա հեղափոխությամբ
Տավուշի մարզի Իջևանի տարածարջանի Լուսաձոր սահմանամերձ համայնքի ամենացավոտ խնդիրն, ինչպես Հայաստանի բոլոր մարզերում՝ աշխատատեղերի բացակայությունն է ու դրանից բխող արտագաղթը: Համայնքում կաթի արտադրության հիմնադրամ է գործում, բայց աշխատատեղերի խնդիրն այն ամբողջությամբ չի լուծում:
Լուսաձորցիներն իրենց խնդիրների լուծումն ակնկալում են Հայաստանի նոր իշխանությունից ու մասնավորապես իրենց համերկրացի վարչապետ Նիկոլ Փաշինյանից: Հայաստանում միգրացիոն քաղաքականության միջազգային կենտրոնի նախաձեռնությամբ Իջևանի տարածաշրջանի համայնքներ կատարած այցի ընթացքում Ռադիոլուրը ծանոթացել է Լուսաձորցիների խնդիրներին ու ակնկալիքներին։
Տավուշի մարզի Լուսաձոր համայնքն ունի 750 բնակիչ, որից 150-ն այս տարի արտագնա աշխատանքի է մեկնել: Համայնքի ղեկավար Վարդան Սարդարյանն ասում է, որ նախկինում ծխախոտագործության լավ ավանդույքներով հայտնի գյուղի հիմնական խնդիրն այսօր աշխատատեղերի բացակայությունն է:
Գյուղի հիմնական դպրոցում 29 աշակերտ է սովորում, այս տարի 5 շրջանավարտ են ունեցել: Համայնքն ունի 170 հեկտար վարելահող, որի 50 հեկտարը հատկացրել են 2012 թվականից համայնքում գործող «ՀիմնաՏավուշ» կաթի արտադրությամբ զբաղվող հիմնադրամին: Վերջինը Եվրոպայից բերած իր կովերի համար այդ տարածքում խոտ է աճեցնում։
Հիմնադրամում Լուսաձորից 15 ընտանիք է աշխատում, սակայն համայնքի զբաղվածության խնդիրը սրանով, իհարկե, չի լուծվում: Հանրապետական գյուղապետը խոստոնավում է, որ իրենց գյուղն էլ ոգևորվել է թավշյա հեղափոխությամբ:
Առաջիններից մեկն է եղել, որ արձագանքել է ցույցերին, չնայած անձամբ դրանց չի մասնակցել: Այդուհանդերձ, Լուսաձորի ղեկավարը կարծում է, որ իշխանությունից բացի մարդիկ էլ փոխվելու կարիք ունեն:
Համայնքում ծնելիությունը նվազում է, և սա անհանգստացնում է գյուղապետին: Ի դեպ, այս խնդրին մենք առնչվեցինք համայնքի բնակիչների հետ տարբեր զրույցներում: Ծնելիության անկման ցուցանիշն այստեղ պայմանավորված է ոչ միայն սոցիալական, այլև առողջապահական խնդիրներով:
Մի ընտանիքում հյուրընկալվեցինք, որտեղ երիտասարդ երկու հարսներն այս պահին բուժվում են, որպեսզի կարողանան երեխա ունենալ։
Լուսաձորի բնակիչների մտահոգության առանցքում, ինչպես արդեն նշվեց, աշխատատեղերի բացակայությունն է: Տիկին Սուսաննան ևս դրանից է դժգոհում, իսկ ամուսինն արդեն մի քանի տարի է, որ արտագնա աշխատանքի էլ չի մեկնում, առողջական խնդիրները թույլ չեն տալիս, ասում է։
Իջևանի տարածաշրջանի Լուսաձոր համայնքը, այդուհանդերձ, լցված է լավատեսությամբ: Թավշյա հեղափոխությունն այստեղ շատերին է ոգևորել։
Ի դեպ, հունիսի 1-ին Լուսաձորի գյուղապետարան կատարած այցի ժամանակ կարդացինք պատուհանին փակցրած հայտարարությունը՝ մայիսի 31-ին համայնքապետարանում ժողով հրավիրելու առնչությամբ:
Համայնքապետ Վարդան Սարդարյանը պարզաբանեց՝ «Ելք» դաշինքի Իջեւանի մի խումբ անդամներ հանդիպել են գյուղի բնակիչների հետ ու լսել նրանց խնդիրները: