Ինչ հանգուցալուծում ստացավ Առողջապահության ազգային ինստիտուտի թնջուկը
Առողջապահության նախարարն Արսեն Թորոսյանն այսօր ֆեյսբուքյան էջում քննադատել է համակարգի աշխատակիցների վարքագիծը։
Պատճառը՝ Առողջապահության ազգային ինստիտուտում ստեղծված իրավիճակն է:
Նախարարը օրեր առաջ էր հայտարարել, որ ինստիտուտի տնօրենի պաշտոնում այլ թեկնածու է տեսնում, իսկ ներկայիս տնօրեն Ալեքսադր Բազարչյանին առաջարկել էր տեղափոխվել նախարարություն։ Սակայն հունիսի 1-ին ինստիտուտում սկսվեց բողոքի ակցիա, կազմակերպվեց ստորագրահավաք՝ ի պաշտպանություն տնօրենի։
Պահանջը մեկն էր՝ Բազարչյանը պետք է շարունակի ղեկավարել Առողջապահության ազգային ինստիտուտը։ «Ռադիոլուրը» փորձեց պարզաբանումներ ստանալ Առողջապահության ազգային ինստիտուտի տնօրենից։ Ալեքսանդր Բազարչյանը նշեց, որ բողոքն ինքնաբուխ էր։
Ի դեպ՝ առողջապահությանն նախարարն այսօր պնդում էր, որ այդ ինստիտուտը պետք է ոտքի կանգնեցնել՝ միաժամանակ նշելով, որ տնօրեն Ալեքսանդր Բազարչյանը հանրային առողջապահության ոլորտում ճանաչված մասնագետ է։ Ալեքսանդր Բազարչյանը մեզ հետ զրույցում նշեց, որ կադրային քաղաքականության և կառավարման առումով փոփոխություններ պետք է կատարվեն, քանի որ հիմա բոլորովին այլ իրողություն է ստեղծվել: