Նիկոլ Փաշինյանի կառավարությունը հաստատել է գործունեության ծրագիրը
Նիկոլ Փաշինյանի կառավարությունն այսօր հաստատել է գործունեության ծրագիրը: Այն հունիսի յոթին կներկայացվի խորհրդարան։
Այսօր գործադիրը նախագիծը ներառել էր չզեկուցվող հարցերի շարքում: Կառավարության ղեկավարը նշել է, որ իրենք արդեն քննարկել են, իսկ հրապարակային քննարկումները կծավալվեն խորհրդարանում:
Կառավարության նիստի զեկուցվող հարցերի գերակշիռ մասը պաշտոնանկություններն ու նոր նշանակումներն էին:
Տասը մարզից ութն արդեն նոր ղեկավար ունի: Այս պահին նոր նշանակումներ չկան միայն Սյունիքում ու Արմավիրում: Հատկանշական է, որ ութ մարզպետների նշանակումներից միայն վեցի նախագծերն էին ներառված կառավարության նիստի օրակարգում:
ՀՅԴ-ն այս կառավարությունում ունի երկու մարզպետ՝ Արագածոտն վերադարձավ Աշոտ Սիմոնյանը: Գեղարքունիքի մարզի կառավարումը վստահվեց Իշխան Սաղաթելյանին: Նշանակված մարզպետների հիմնական մասը կամ ՔՊ վարչության անդամ է, կամ՝ համակիր, ինչպես, օրինակ, Վահե Ղալումյանը ՝ Տավուշի նորանշանակ մարզպետը: Նա «Քաղաքացիական պայմանագիր» կուսակցության համակիր է, բայց դեռ անդամ չէ: ՔՊ անդամ է Կոտայքի նորանշանակ մարզպետ Ռոմանոս Պետրոսյանը: Նա այս պաշտոնում փոխարինում է Կարապետ Գուլոյանին՝ ԲՀԿ կուսակցության առաջնորդ Գագիկ Ծառուկյանի փեսային: Այս մարզը ավանդաբար համարվում է, այսպես ասենք, ԲՀԿ-ական մարզ: Ինչպե՞ ս է Պետրոսյանն աշխատելու այս մարզում:
«Առաջին քայլը մարզի խնդիրներին ծանոթանալն է»,- ասաց: Այս պահին չի կարող հստակեցնել՝ չարաշահումների բացահայտումների հետքերով կգնա՞ն, թե՞ ոչ:
«Քաղաքացիական պայմանագիր կուսակցության վարչության անդամ է նաև Գարիկ Սարգսյանը: Նա Արարատի մարզի Նոր կյանք համայնքի ղեկավարն էր, այժմ կղեկավարի նույն մարզը: Այս մարզը ղեկավարում էր նախկին դաշնակցական, իսկ վերջին տարիներին ՀՀԿ համակիր Արամայիս Գրիգորյանը : Նորանշանակ մարզպետը անելիքներ շատ ունի։
Մարզի ղեկավարը չբացառեց՝ չարաշահումների հետ կապված բացահայտումներ գուցե լինեն, նաև խոստացավ՝ հասանելի ղեկավար է լինելու բնակիչների համար: Իր փոխարեն համայնքի ղեկավարի թեկնածու ունի՝ ՔՊ-ից, այս պահին, փակագծերը չի բացում: Այս մարզում մի քանի համայնքի ՀՀԿ-ական ղեկավար հրաժարվել են կուսակցությունից:
ՔՊ անդամ է նաև Շիրակի նորանշանակ մարզպետ Կարեն Սարուխանյանը: Շիրակն ավանդաբար համարվում է ամենաաղքատ մարզը: Այսօր իսկ կծանոթանա աշխատակազմի հետ:
Կարեն Սարուխանյանը արտահերթ ընտրությունների կազմակերպման որևէ հանձնարարական վարչապետից չի ստացել: Նախկին ՀՀԿ-ական Արագած Սաղաթելյանը նշանակվեց Վայոց ձորի մարզպետ, նա Վայքի քաղաքապետն էր: Հրանտ Մարգարյանը Լոռու նոր մարզպետն է։ Նա Վանաձորի ավագանու անդամ է, 2016 թվականի ՏԻՄ ընտրություններում ԲՀԿ-ի քաղաքապետի թեկնածուն էր: Այս պաշտոնը վստահվեց ԲՀԿ-ին: Վարչապետ Նիկոլ Փաշինյանը շնորհավորեց նորանշանակ մարզպետներին:
Տասը մարզից ութը նոր մարզպետ ունի
Նրանք արդեն աշխատանքի են անցել՝ չսպասելով պաշտոնական ներկայացմանը: