Հաջորդ շաբաթ մեկնարկող ԱԺ լիագումար նիստի օրակարգում ընդգրկվել է վերջին շրջանի աղմկահարույց նախագծերից մեկը:
Պետաիրավական եւ մարդու իրավունքների հարցերի մշտական հանձնաժողովն այսօր դրական եզրակացություն է տվել ընտանեկան բռնության կանխարգելմանը նվիրված օրինագծին:
Փոփոխություններ անվանումից մինչեւ բովանդակություն. «Ընտանեկան բռնության կանխարգելման» օրինագծից համատարած դժգոհությունները հանգեցրեցին լայնամասշտաբ փոփոխությունների:
«Ընտանիքում բռնության կանխարգելման, ընտանիքում բռնության ենթարկված անձանց պաշտպանության եւ ընտանիքում համերաշխության վերականգնման մասին». ահա նման անուն ունի այն փաստաթուղթը, որը հայտնվեց խորհրդարանի օրակարգում:
Այն պատգամավորներին ներկայացնելու պատասխանատու գործը վստահվել է արդարադատության փոխնախարար Վիգեն Քոչարյանին:
Հանրապետական պատգամավորների շրջանում առկա մտավախությունները փարատվել են նաեւ միջկուսակցական քննարկումների արդյունքում՝ ասում է ԱԺ փոխնախագահ Արփինե Հովհաննիսյանը։
Նա նախագծի հարակից զեկուցողն է: Փաստաթուղթն ավելի ընդունելի է դարձել խորհրդարանական մեծամասնության համար:
Սակայն այսքանը բավարար չէր պատգամավորներին հասկանալու կառավարության զիջումների չափը: Փոխնախարարից նրանք պահանջեցին ավելի հստակ, կենցաղային օրինակով ներկայացնել զիջումները։
քննարկումից մի հատված
Վերջին արձագանքողը պատգամավոր Անդրանիկ Կարապետյանն էր: Կարելի է ենթադրել, որ կառավարության զիջումները գոհացրել են նաեւ դաշնակցություն խմբակցությանը: «Ծառուկյան» դաշինքից պատգամավոր Գեւորգ Պետրոսյանը ներկայացրեց բացառապես իր անձնական կարծիքը՝ չիմանալով, թե ինչ որոշում օրինագծի վերաբերյալ կընդունի խմբակցությունը:
Առաջարկն արդեն վեր հանեց նոր խնդիրներ, որոնց լուծմանը կողմնակից է պետաիրավական եւ մարդու իրավունքների պաշտպանության հարցերի մշտական հանձնաժողովի ղեկավար Հրայր Թովմասյանը:
Սրանք արդեն այլ կարգավորումներ են: Իսկ ընտանեկան բռնությանը վերաբերող նախագիծն առաջին ընթերցմամբ խորհրդարանում կքննարկվի արդեն հաջորդ շաբաթ, ինչպես երեւում է, առանց լուրջ հակադրությունների եւ ընդվզումների:
