Թումանյանի «Լոռեցի Սաքոն»՝ խորեոգրաֆիայի լեզվով․ «Դեպի անհունը»

Ամենայն Հայոց բանաստեղծի 155-ամյակն արժևորեց նաև Ժողովրդական երաժշտության և պարի ազգային կենտրոնի Հայաստանի «Բարեկամություն» պետական անսամբլը։

Լոռվա սար ու ձորի, ժայռ ու քարի, մոլեգնած Դեբեդի ծնունդը՝ «Իգիթ Սաքոն» խորեոգրաֆիկ ներկայացումը, բեմադրել է ժողովրդական դերասան Նորայր Մեհրաբյանը։ Գրիգոր Հախինյանի ստեղծագործության ուղեկցությամբ՝ նա եզակի արհեստավարժությամբ է արտացոլել Թումանյանի բացառիկ ներքնատեսության ուժն ու զգացումների խորքը խորեոգրաֆիայի լեզվով։

Հայաստանի ժողովրդական արտիստ Նորայր Մեհրաբյանը պատմում է, որ «Լոռեցի Սաքոն» առաջին անգամ բեմադրել է Հալեպում։ Վերադառնալուց հետո «Բարեկամություն» անսամբլով բեմադրությունը ներկայացրեց ավելի մեծ կտավով՝ Երևանում։ Որոշ ժամանակ անց «Անի» պարախմբով բեմադրեց ԱՄՆ–ում։ 2024 թվականի ամռանը խորեոգրաֆիկ լուծումներով Մեհրաբյանը վերակենդանացրեց բեմադրությունը։