«Ելք»-ը երթ կանցկացնի ընդդեմ թանկացումների
հրապարակված 09.43
լրացված 17.52-ին
Ազգային Ժողովի «Ելք» խմբակցությունը հունվարի 19-ին պատրաստվում է երթ անցկացնել՝ ընդդեմ թանկացումների: Այս մասին իր ֆեյսբուքյան էջում երեկ գրել է խմբակցության ղեկավար Նիկոլ Փաշինյանը:
Ընդդիմադիր խմբակցությունը կարծում է, որ 2018 թվականի առաջին օրերից ծավալվող թանկացումները սպառնում են սոցիալական լուրջ հետևանքներով, և հանրությունը պետք է կառավարությանը ստիպի գնաճը զսպող քայլերի գնալ:
Ո՛չ թանկացումներին և հարկային բեռի ավելացմանը՝ այս կարգախոսով է հունվարի 19-ին բողոքի երթ հրավիրում Ազգային ժողովի Ելք խմբակցությունը: Նախատեսում են, որ երթով կշարժվեն քաղաքի կենտրոնական փողոցներով ՝ մեկնարկը տալով Մոսկվա կինոթատրոնի հրապարակից: Թե ինչպես կարձագանքի հանրությունը Ելքի կոչին, խմբակցությունում դեռ չգիտեն, բայց համոզված են, որ խնդիրը մտահոգում է հանրության լայն շերտերին:
«2018թ. հունվարից ուժի մեջ մտած Հարկային օրենսգրքով բարձրանում է միջին խավի հարկային բեռը՝ 150 հազար աշխատավարձ ստացող քաղաքացիները կվճարեն 28 տոկոս եկամտահարկ նախկին 26 տոկոսի փոխարեն: ԵԱՏՄ մաքսային օրենսգրքով պայմանավորված էլ փոխվել են ակցիզային դրույքաչափերը, թանկացել են բենզինը, դիզվառելիքը, ալկյոհոլային խմիչքները, ծխախոտը»:
«Ելք» խմբակցության պատգամավոր Լենա Նազարյանի խոսքով՝ այս իրավիճակն է ստիպում մտածել այնպիսի քայլերի մասին, որոնք իշխանություններին կստիպեն վերանայել վարվող քաղաքականությունը:
Ելքի ներկայացուցչի կարծիքով՝ նախաձեռնության ազդեցությունը ուղղակիորեն կախված է հանրության արձագանքից: Թերևս նաև քաղաքական մյուս ընդդիմադիր ուժերի արձագանքից: Արդյոք Ծառուկյան դաշինքը պաշտպանելու է Ելքի նախաձեռնությունը:
Բողոքի երթին միանալ-չմիանալու հարցը դեռևս չի քննարկվել ՝ ասում է խմբակցության ներկայացուցիչ, ԱԺ փոխնախագահ Միքայել Մելքումյանը, նաև նկատում, որ ամեն քաղաքական ուժ ինքն է ընտրում պայքարի իր մարտավարությունը: Դաշինքում, սակայն, համոզված են, որ կառավարությանը պետք է ստիպել գնաճը զսպող քայլերի գնալ:
«Մենք չենք քննարկել այդպիսի հարց, բայց այն, որ կառավարությանը պետք է ստիպել, նրա առաջ խնդիր դնել, որ դու ոնց ես մեկնաբանում այս հարցը, որը բերում է ժողովրդավարական լուրջ դժգոհությունների: Պետք է քաղաքական զինանոցի տարբեր մեթոդները կիրառենք: Ապրիլի 2-ի ընտրություններից անցել է 9 ամիս, ժողովուրդը գնացել եւ ձայն է տվել այն իշխանությանը, որը գները բարձրացնում է: Հիմա ժողովուրդը ինքը պետք է գտնի մեխանիզմներ, դիմումով պահանջի՝ ես քեզ ձայն եմ տվել իշխանություն, որ դու կյանքս լավացնես: Հիմա լավանու՞մ է, թե՞ չի լավանում»:
Միքայել Մելքումյանը հստակ կախատաեսում չունի, թե ինչ աջակցություն կստանա Ելքի նախաձեռնությունը հանրության կողմից:
«Որ ժողովրդի մոտ դժգոհություններ կան, դա փաստ է, բայց թե ինչ ծավալի մարդ դուրս կգա, չեմ կարող կանխատեսումներ անել: Պետք է այնպես անել, որ ժողովուրդը նորից չաղքատանա: Աղքատության զսպման ձեւերն ամեն քաղաքական ուժ ինքը պետք է որոշի: Մենք համենայնդեպս, նման հարց չենք քննարկել»:
Փոխարենը խիստ միանշանակ է խորհրդարանական մեծամասնության դիրքորոծումը: ՀՀԿ-ում համոզված են, որ թանկացումների դեմ պայքարում են ոչ թե բողոքի երթերով, այլ՝ աշխատանքով ու առաջարկություններով: Այդ կարծիքին է, մասնավորապես, ՀՀԿ խմբակցության քարտուղար Գագիկ Մելիքյանը:
« « Ելք» դաշինքին կհորդորեի, որ առաջին հերթին ճիշտ առաջարկություններով փորձի ցույց տալ այն ճանապարհը, որ առաջիկայում կատարվող աշխատանքների շնորհիվ կարող է բերել գնանկման»:
Նկատենք, որ Հարկային նոր օրեսնգիրքը ընդունել է դեռևս նախորդ գումարման խորհրդարանը: Այն ուժի մեջ է մտել 2018-ի հունվարից: Սակայն մինչև ուժի մեջ մտնելը փաստաթուղթը հասցրել է երեք անգամ փոփոխությունների ենթարկվել: Վերջին ծավալուն փոփոխություններն օրենսգրքում կատարվել են 2017-ի դեկտեմբերին: Դրան կողմ է քվերակել 56 պատգամավոր , միայն կոալիցոին ՀՀԿ-ից ու Դաշնակցությունից: