Դավիթ Մուրադյանը ծնվել է 1997 թվականի նոյեմբերի 25-ին Գյումրիում։ 2015-ին ավարտել է Հայաստանի պետական տնտեսագիտական համալսարանի Գյումրիի մասնաճյուղի հենակետային վարժարանը։ 2015-ին ընդունվել է ԵՊՀ Միջազգային հարաբերությունների ֆակուլտետ, 2016-ին զորակոչվել է բանակ։ Ծառայել է Արմավիրի ուսումնական զորամասում, ապա՝ ծառայությունը շարունակել Արցախի Իվանյանի զորամասում։ «Զորակոչվելիս ինձ համար տարբերություն չկար՝ Հայաստանում կծառայեմ, թե՝ Արցախում, Արցախը նույնպես իմ հայրենիքն է»,-ասում է Դավիթը։
44-օրյա պատերազմին մասնակցել է որպես կամավորական։ Սեփական աչքերով է տեսել Շուշիի անկումը, իսկ Շուշիից նահանջի ճանապարհին հասկացել Կոմիտասին, որը խելագարվեց՝ տեսնելով իր ժողովրդի ողբերգությունը։ Պատերազմին ու ողբերգությանը փորձում է հաղթել ապրելով, աշխատելով ու շարունակաբար կրթվելով։ DIGITAIN ընկերությունում աշխատանքին զուգահեռ, որպես «4090» հիմնադրամի դրամաշնորհային ծրագրի շահառու այժմ սովորում է «Եվրասիա միջազգային համալսարանի Կառավարում բաժնում։