Ու՞մ և ի՞նչ է դիտարկելու ռուս-թուրքական մոնիթորինգային կենտրոնը
Ռուս-թուրքական մոնիթորինգային կենտրոնի կազմում ընդգրկված ռուս զինվորականները նախապատրաստական դասընթացներ են անցնում և պատրաստվում են մեկնել Ադրբեջան։ Այս մասին հայտնում են ՌԴ Պաշտպանության նախարարությունը։
Նշվում է, որ միասնական կենտրոնի անձնակազմը հակամարտության գոտում իրականացնելու է իրավիճակի, հրադադարի ռեժիմի պահպանման մշտադիտարկում ՝ նաև անօդաչու թռչող սարքերի միջոցով:
Նման կենտրոն ստեղծելու մասին համաձայնությունը Ռուսաստանի և Թուրքիայի միջև ձեռք էր բերվել նոյեմբերի 9-ի եռակողմ հայտարարության ստորագրումից հետո։ Նշվում էր, որ կենտրոնը տեղակայվելու է Ադրբեջանի տարածքում, դրանում հավասարապես ներգրավվելու են ռուս և թուրք զինվորականներ։
Հակամարտության գոտում Թուրքիայի ներկայությունը մտահոգիչ է և անցանկալի, բայց իրավիճակը հայկական կողմի համար ավելի շահեկան է, քան կարող էր լինել՝ «Ռադիոլուրի» հետ զրույցում ասել է թուրքագետ Կարեն Հովհաննիսյանը։ Նրա խոսքով՝ Թուրքիայի նկրտումներն ավելին էին․ թուրքական կողմն ուզում էր հակամարտության գոտում ներկա լինել խաղաղապահների տեսքով և կենտրոնը տեղակայել հենց ԼՂԻՄ–ի տարածքում։ Այս առումով իրավիճակն ավելի շահեկան է՝ ասել է Հովհաննիսյանը։
Թուրքագետի կարծիքով՝ կենտրոնի գոյությունը Ռուսաստանի դիրքերի թուլացում է։ Թուրքիայի ռազմական ներկայացվածությունն այնքան վտանգավոր չէ հայկական երկու պետությունների, որքան Ռուսաստանի համար, ասել է թուրքագետը և հավելել՝ կենտրոնն իրականում հետևելու է ռուս խաղաղապահների շարժին։
Մոնիթորինգի կենտրոնի խնդիրների, նպատակների ու ռիսկերի մասին «Ռադիոլուրը» զրուցել է թուրքագետ Կարեն Հովհաննիսյանի հետ։