Հայաստանում կանցկացվի գիտության և արվեստի«STARMUS» փառատոնը
Գիտության ու արվեստի միջազգային «STARMUS» 6-րդ փառատոնն այս տարի անցկացվելու է Հայաստանում՝ սեպտեմբերի 6-11-ը։ Այսօր հայտնել է կրթության, գիտության, մշակույթի, սպորտի նախարարի տեղակալ Արթուր Մարտիրոսյանը։
Մեր առաջնահերթ նպատակը գիտության արժևորումն է՝ ասել է փոխնախարարը և հույս հայտնել, որ փառատոնը կնպաստի տեխնոլոգիական կրթության զարգացմանը։
Որոշվել է նաև, որ Հայաստանը այս տարի կստանձնի ԱՊՀ երիտասարդական խորհրդի նախագահությունը, միաժամանակ այստեղ կիրականանա նաև «100 գաղափար ԱՊՀ-ի համար» ծրագրի միջազգային փուլը։ Հայաստանի երիտասարդական մայրաքաղաքն էլ այս տարի կլինի Սյունիքի մարզկենտրոն Կապանը։
Կապանը երիտասարդական մայրաքաղաք էր նաև 2020-ին, սակայն համավարակով ու պատերազմով պայմանավորված՝ նախատեսված միջոցառումները չեն կայացել և որոշվել է, որ քաղաքը 2021-ին նույնպես լինի տարվա երիտասարդական մայրաքաղաք։
Համավարակը նաև նոր նախաձեռնությունների հիմք է դարձել Նախարարությունը մտադիր է իրականացնել մի ծրագիր, որի նպատակը հայկական կրթական մեծ պլատֆորմի ստեղծումն է։
«Սա հավակնոտ ծրագիր է, քանի որ հարթակն իր մեջ ներառելու է բոլոր կրթական պաշարները։ Հիմա ընդգրկելու է հանրակրթական կրթության տարբեր բովանդակություն, և այնպես ուժեղ, կարող պլատֆորմ է լինելու, որ հետագայում նաև բուհական, մասնագիտական կրթության, Սփյուռքի համար դասընթացներ է ներառելու»,-նշել է Արթուր Մարտիրոսյանը։