Զբոսայգու չախտահանված մարզասարքերը կարող են կորոնավիրուսի տարածման պատճառ դառնալ
Արմավիր քաղաքի զբոսայգում բակային մարզումների համար նախատեսված բացօթյա մարզասրահն արդեն մի քանի տարի պրոֆեսիոնալ և սիրողական սպորտով զբաղվողների մարզվելու վայր է դարձել:
Կարանտինի ընթացքում այս սրահից օգտվողների թիվն ավելացել է, բայց հանրային վայրի մետաղական մարզասարքերը պարբերաբար չեն ախտահանվում: Արմավիրի զբոսայգին վերջին անգամ ախտահանվել է հունիսի 1-ին:
Կորոնավիրուսի տարածումը կանխելու նպատակով Արմավիր քաղաքում դեռ փակ են համայնքային մարզադպրոցները: Արտակարգ դրության պայմաններում մարզիկների մարզվելու վայրը մարզադահլիճներից տեղափոխվել է այգու բացօթյա մարզասրահ, որտեղ հիմնականում բակային մարզումների համար նախատեսված երկաթե մարզաձողեր են տեղադրված: Այստեղ օրվա տարբեր ժամերին կարելի է հանդիպել մարզվող երիտասարդների ու պատանիների: Նրանք մարզվում են, սակայն վստահ չեն, որ մետաղական մարզասարքերն ախտահանվում են և համավարակն իրենց չի սպառնալու․
«Այգու տնօրենը կարող էր ախտահանել էս տարածքը, որովհետև հենց հիմա էլ երեխաներ են եկել ներս, կախվում են տուրնիկներից, սկսում են մարզվել: Իրենց հետևից էլ կարող է մի ուրիշ խումբ գա, չի բացառվում, որ ինչ-որ մեկը վարակված լինի, էդ վարակը փոխանցվի բոլորին»:
Զրուցակիցս մարզիկ է և մարզիչ, ամեն առավոտյան իր մարզումներն անցկացնում է այգու բացօթյա մարզասրահում, և երբևէ չի նկատել, որ ախտահանվեն մարզական սարքերն ու տարածքը: Այստեղ իրենց մարզական վիճակն են փորձում պահպանել պրոֆեսիոնալ մարզիկներն ու նրանց սաները.
«Լավ կլիներ, որ ախտահանվեր գոնե 2 ամգամ, որովհետև առավոտյան գալիս են մարզվողները, քանի որ հիմա կարանտինի պատճառով դադարեցրել են իրենց մարզումները սպորտդպրոցներում և այստեղ են գալիս»:
«Արմավիրի քաղաքային զբոսայգի» ՀՈԱԿ-ի տնօրեն Դավիթ Պետրոսյանը նշեց, որ վերջին անգամ այգում ախտահանման աշխատանքներն իրականացվել են հունիսի 1-ին.
«Մի անգամ ցիստեռը մտցրեցինք, քլորաջրով լվացրեցինք, հետո սրսկման ապարատով ախտահանեցինք նստարանները, խաղահրապարակը, բեսեդկաները: Մարզասարքերը մոտավոր 2 շաբաթը մեկ ենք անում, բայց պիտի ավելի հաճախ անենք ավելի, ոնց հասկանում եմ»,- ասում է Դավիթ Պետրոսյանը ։
Թեպետ Արմավիրի այգու տնօրենը նկատում է քաղաքի միակ բացօթյա մարզասարքերից ամեն օր օգտվող մարզիկներին, բայցև չժխտեց՝ մարզասարքերն ամեն օր չեն ախտահանվում, քանի որ դժվար է մաքրուհու համար:
Այգու սթրիթ վորքաութի մարզասարքերից օրվա տարբեր ժամերին օգտվում են նաև երեխաներն ու կանայք: Եթե մարզիկներն ինչ որ կերպ կարող են պահպանել անձնական հիգիենան, ապա դպրոցականների համար չախտահանված մետաղաձողերը կորոնավիրուսի տարածման միջոց կարող է լինել: Տնօրեն Դավիթ Պետրոսյանը որոշեց.
«Սրսկման ապարատ կա, քլորը կբացեմ, կլցնեմ սրսկման ապարատի մեջ, կտամ աշխատողին, դնի ուսին, սրսկի»,- նշում է Դավիթ Պետրոսյանը։
Զբոսայգում շատացել են մանկական ձայները: Քաղաքի կանաչ գոտում երեխաներին բերում են զբոսանքի, որոնք օգտվում են նաև խաղահրապարակից: Երեխաները գալիս են երբեմն ծնողների, երբեմն տատիկ-պապիկների հետ:
Զրուցակիցս խաղահրապարակում հետևում էր թոռնիկին. «Ես մի 2 ամգամ տեսել եմ, որ ախտահանում են, հիմնականում առավոտ շուտ, մի անգամ էլ երեկոյան եմ տեսել: Երեխաներ են, իրենք էդ հարցում շատ զգույշ են: Խաղահրապարակից հետո երեխային լվացնում եմ, հետո մեքենայի մեջ օղի ունեմ, փչում եմ»:
Եթե մարզասարքերի ախտահանման հետ կապված այգու տնօրեն Դավիթ Պետրոսյանը երկմտեց, ապա մանկական խաղահրապարակների մաքրման հարցում՝ վստահաբար պատասխանեց.
«Ամեն օր աշխատողը ժավելի խոնավ տրյապկայով մաքրում է բեսեդկաները, որտեղ տարիքով մարդիկ եննստում, հետո խաղահրապարակի սղիկները: Ինքը ամեն առավոտ մաքրում է, ուղղակի էդ մարզման տեղը ինտերվալը մի քիչ երկար է, բայց կարամ ավելի շուտ-շուտ անեմ, խնդիր չի»:
Պարետի սահմանած անվտանգության կանոններով կորոնավիրուսային հիվանդության տարածումը կանխարգելելու նպատակով ախտահանումն իրականացվում է քլորի հիմքով կամ 60-80 տոկոս սպիրտ պարունակող ախտահանիչ նյութերով: Զբոսայգում հիմնականում երկաթե նստարաններ են, մարզասարքեր, զրուցարաններ և պլաստմասսայից սղարաններ, իսկ ամռանն այստեղ այցելուների պակաս չկա: