«Առողջապահական ապահովագրությունը, իհարկե, անհրաժեշտ է, բոլոր առաջատար պետություններում այն գործում է։ Բայց կամավորության սկզբունքը ևս շատ կարևոր է՝ հաշվի առնելով սոցիալական բաղադրիչը։ Մեր երկրի քաղաքացիների մեծ մասն ունի միջին և միջինից ցածր եկամուտներ», – անդրադառնալով առողջության հարկ անվանումը ստացած և հասարակական բուռն քննարկումների առիթ դարձած նախագծին՝ նշում է «Հայացք Գյումրիից» հաղորդաշարի հեղինակ, տնտեսագետ Կարեն Ավագյանը։
Տնտեսագետի համար անհասկանալի է նաև , թե ինչու է կառավարությունը ուզում շարժվել ոչ թե պարտադիր բժշկան ապահովագրության, այլ հարկատեսակ սահմանելու ճանապարհով։
«Եթե ծառայությունը ունի որոշակի գին, ճիշտ չէ տոկոս սահմանել աշխատավարձի նկատմամբ»,–շարունակում է տնտեսագետը։
Ավագյանը տարակուսում է նաև, թե ինչու է պետությունն իր վրա վերցնում ողջ գործընթացը և գերադասելի համարում պետական ոլորտ տեղափոխել հսկայական գումարներ․ խոսքը, նախնական հաշվարկներով, 150–500 մլրդ դրամի մասին է։