Այսօր կեսօրին «Յութուբ»-ում հրապարակվեց Ազգային անվտանգության ծառայության տնօրեն Արթուր Վանեցյանի և Հատուկ քննչական ծառայության պետ Սասուն Խաչատրյանի գաղտնալսված հեռախոսազրույցը:
Ըստ ձայնագրության՝ երկու պաշտոնյաները քննարկում են «Մարտի 1-ի» գործի, Ռոբերտ Քոչարյանին և ՀԱՊԿ քարտուղար Յուրի Խաչատուրովին կալանավորելու որոշ մանրամասներ:
Ձայնագրությանն անմիջապես ֆեյսբուքյան ուղիղ կապով արձագանքեց վարչապետը, հետո ասուլիս հրավիրեցին երկու ծառայությունների ղեկավարները:
Տարօրինակ և մտահոգիչ՝ Ազգային անվտանգության ծառայության տնօրենն այսպես է գնահատում փաստը, որ հաջողվել է գաղտնալսել ԱԱԾ տնօրենի և ՀՔԾ պետի հեռախոսազրույցը: Դատախազությունն արդեն քրեական գործ է հարուցել: Արթուր Վանեցյանը հույս ունի, որ քննությունը կպարզի, թե ով է ձայնագրել , ինչպես է գաղտնալսվել խոսակցությունը: Այդպիսի տեխնիկական հնարավորություն ունի ԱԱԾ-ն: Հնարավոր համարո՞ւմ է, որ ԱԱԾ-ն գաղտնալսած լինի ԱԱԾ պետին:
«Չեմ կարծում, որ մեր ծառայութնյունում կան դավաճաններ: Քանի որ խոսում ենք մեծ փողերով մարդկանց մասին, չեմ բացառում, որ նրանք են կարողացել գնել համապատասխան տեխնիկա և գատնալսումն իրականացնել: Բոլոր հարցերի պատասխանը կտա քննությունը»:
Ինչ վերաբերում է բովանդակությանը, ապա երկու պաշտոնյաներն էլ չեն հերքում, որ նման հեռախոսազրույց ունեցել են: Գաղտնալսումն ու դրա հրապարակումը գնահատում են որպես իրենց ղեկավարած կառույցների գործունեությունը կաշկանդելու փորձ: Սասուն Խաչատրյանը սա կապում է հատկապես Մարտի 1-ի գործի քննության հետ:
«Ընդամենը խղճուկ փորձ է մեզ կանգնեցնելու, բայց վստահ եղեք ՝չենք ընկճվելու և անելու ենք մեր գործը»:
Ձայնագրությունում Սասուն Խաչատրյանը և Արթուր Վանեցյանը խոսում են Ռոբերտ Քոչարյանին, Յուրի Խաչատուրովին կալանքի միջնորդությունների մասին մասին: ՀՔԾ պետը, պատմում է թե ինչպես է արձագանքել որոշմանը երկրորդ նախագահը, Արթուր Վանեցյանը հորդորում է ուշադիր լինել իրավական հիմքերին: Զրույցի ուշագրավ հատվածներից մեկը, որ վերաբերում է Քոչարյանի կալանքի միջնորդությունը քննող դատավորի հետ զրույցին:
«Ինձ դատավորը զանգեց, ով որ պիտի կալանքը տա, մի քիչ վախեցած է, ասացի՝ նայի ողջ գործը, նայի, դուխով: Ասաց՝ պարոն Վանեցյան, մի հատ հիմքերը նայեմ, ասի՝ նայի հիմքերը, կզանգես, կալանքը ուզես-չուզես պիտի տաս»:
Ձայնագրության մյուս ուշագրավ է հատվածն էլ Արթուր Վանեցյանի արձագանքն է Յուրի Խաչատուրովի խափանման միջոցին վերաբերող հարցին:
«Խաչատուրովի հետ գործ չունենք, խայտառակ կլինենք, չփակեք»:
Երկու մարդու մասնավոր զրույց է, որի ընթացքում շատ բան ասվել ու քննարկվել է խոսակցական մակարդակով: Արթուր Վանեցյանն ասում է՝ քննարկել են նախկին պաշտոնյաների կալանավորմանը վերաբերող իրավական հարցեր: Ձայնագրության այն հատվածը, որում խոսվում է կալանավորելու վարչապետի հորդորի մասին այսպես է բացատրում:
«Վարչապետի ասածը նշանակում է հետևյալը՝ քրեական գործով անցնող անձինք՝ անկախ իրենց անուններից, զբաղեցրած պաշտոններից, պետք է ենթարկվեն պատասխանատվության, եթե կան դրա հիմքերը»։
Ի դեպ, ՀՔԾ պետն այսօր որոշ նոր մանրամասներ ներկայացրեց Մարտի 1-ի գործով քննությունից, ասաց, որ նպատակ չուներ դրանք հիմա բացահայտել, բայց ստիպված անում է:
«Քննությամբ արդեն իսկ հիմնավորվել է, որ բանակը ոչ միայն մասնակցել է Մարտի 1-ի իրադարձություններին այլ նաև կրակել է: Բանկաը կրակել է մարդկանց բնակարանների ուղղությամբ»:
Ըստ Սասուն Խաչատրյանի՝ քրեական գործով հիմնավորվել է,որ փետրվարի 23-ից հետո բանակի զինվորներին գումար է բաժանվել այդ գործողություններում ներգրավվելու համար: ՀՔԾ պետը փաստաթղթեր ներկայացրեց:
«Իմ ձեռնքին ՀՔԾ քննիչի կողմից առգրավված մատյանն է, որտեղ հատ-հատ նշված են զինծառայողների, նրանց հրամանատարների անուններն ու ստորագրությունները: Գումարները հանվել են օլիգարխների, պաշտոնյաների հաշիվներից: Դրանք կհրապարակենք հետագայում: Չգիտեմ՝ սա ինչպես են բացատրելու, ինչ են ասելու, որ զինվորներին դարձրել են վարձկաններ ու հանել ժողովրդի դեմ»:
Մինչև ասուլիսը գաղտնալսված ձայնագրությանն անդրադարձել էր վարչապետը՝ շանտաժի չենք տրվելու, կոմպրոմիս չի լինելու՝ հայտարարել էր Նիկոլ Փաշինյանը:
«Ուզում են ճողոպրել պատասխանատվությունից: Մենք շանտաժի չենք տրվելու, մարտի 1-ի գործը պետք է բացահայտվի, մարդասպանները պետք է կանգնեն դատարանի առաջ, թալանվածը պետք է վերադարձվի»: