Երևանի ավագանու «Ելք» խմբակցության անդամները բժշկական հաստատությունից ստացված չարաշահումների վերաբերյալ հերթական ահազանգի հետքերով եղել են Մալաթիա-Սեբաստիա համայնքում գտնվող թիվ 19 պոլիկլինիկա:
Ավագանու անդամները շրջել են բուժհաստատությունում, փորձել ճշտել ահազանգերի հավաստիությունը: Պոլիկլինիկայի շուրջ աղմուկի հետքերով է գնացել «Ռադիոլուր»-ը:
Բուժաշխատողների ահազանգերով Երևանի ավագանու «Ելք» խմբակցության անդամները թիվ 19 պոլիկլինիկայում ուսումնասիրում են չարաշահումների վերաբերյալ ահազանգերի ճշմարտացիությունը: Ահազանգերից մեկը վերաբերում է մամոգրաֆիայի սարքին, որը, ավագանու անդամ Դավիթ Խաժակյանի պնդմամբ, երբևէ չի աշխատել:
«Մամոգրաֆիայի սարքը մեր ունեցած տեղեկություններով երբևէ չի աշխատել: Իմ ձեռքին կա տարբեր ժամանակահատվածներում կատարված 10 հազար դրամի վճարման կտրոններ: Սրանցից մեկը 2018 թվականի է: Բայց այդ սարքը երբևէ չի աշխատել: Որպեսզի այդ խնդիրը չառաջանա, որովհետև մեր ունեցած տեղեկություններով նոր սարքը բերվել է, սակայն չի շահագործվել: Ըստ էության որպեսզի այդ խնդիրը կոծկեն, պարբերաբար տպել են մամոգրաֆիայի այս չեքերը: Ուժշադրություն դարձրեք, որ բոլորի ժամանակահատվածը ամսվա վերջին օրն է»:
Ավագանու անդամների հետ շրջայցի ընթացքում մամոգրաֆիայի սենյակը աշխատանքային ժամին փակ էր, թեեւ տնօրենը տեղեկացված էր ավագանու այցի մասին: Դավիթ Խաժակյանը փորձեց մամոգրաֆիայի սարքի չաշխատելու վերաբերյալ պարզաբանում ստանալ բուժաշխատողներից:
«Դուք երբևէ տեսել եք, որ մամոգրաֆիայի այս սարքն աշխատի: Այն կողմից է դուռը բացվում, այն կողմից են մտնում դուրս գալիս: Իհարկե միացված է եղել այդ ամբողջ սարքերը»:
Սակայն պետք է փաստել, որ դուռը, որտեղ մատնանշեց բուժաշխատողը, նստարանով փակ էր: Այնուհետև եկավ մամոգրաֆիայի բժշկուհի Արմինե Ղազարյանը։ Ասաց, որ սարքը չի աշխատել 25 օր: Պարբերաբար խնդիրներ են ունեցել երևակման հետ կապված: Դավիթ Խաժակյանի՝ վճարման կտրոնների նույն ժամանակահատվածի վերաբերյալ հարցադրմանը բժշկուհին պատասխանեց. «չգիտեմ, կարող է զուգադիպել է»: Երևակման խնդրի հետ կապված բազմիցս են դիմել համապատասխան ծառայություն, սակայն սայլ տեղից չի շարժվել: Բուժական գծով փոխտնօրեն Սուսաննա Նալչաջյանը չգիտեր մամոգրաֆիայի սարքը վերջին անգամ երբ է աշխատել: Հարցին, որ մամոգրաֆիայի բվշկուհին բազմիցս է դիմել սարքի անսարքության մասին, բուժական գծով փոխտնօրենը պատասխանեց:
«Կարևորը, որ մեր հիմնարկության տնօրենը տեղյակ է, եթե տեղեկացրել են»:
Պոլիկլինիկայի գանձապահ Կարինե Գրիգորյանն էլ չգտավ գրանցամատյանը, որպեսզի ասի, թե մամոգրաֆիայի համար վերջին վճարումը երբ է կատարվել: Ավագանու անդամներն այնուհետև շրջեցին մյուս կաբինետներով։
Կանանց կոնսուլտացիայի բաժնի վարիչ Աշոտ Ահարոնյանը հերքեց բողոքները, թե պոլիկլինիկայի կոմունալ վճարումները բուժաշխատողներին աշխատավարձից է կատարվում։
«Ես իմ բաժնի համար եմ պատասխանատու: Մենք կոմունալի վճարումներ չենք կատարել: Դա արել է հիմնարկը»:
Միայն պոլիկլինիկայի ակնաբույժը հաստատեց լուրը: Պարբերաբար փորձել է հաշվապահությունից ճշտել աշխատավարձի չափը կամ ժամանակ առ ժամանակ նկատվող տատանումներն ինչով են պայմանավորված, նրան պատասախանել են, որ ձմռան ամիսներին որոշակի տոկոսներ պահվում են կոմունալ վճարումների համար և դա արվում է օրենքով:
«Ես, օրինակ, ժամանակ է եղել 20-25 հազար դրամի չափով նախորդ ամսվա աշխատավարձի հետ համեմատ փոփոխություն եղելա»:
Պոլիկլինիկայի գլխավոր տնօրեն Սամվել Սարգսյանն օնլայն հետևում էր իր բուժհիմնարկում կատարվող շրջայցին: Ընդունեց ավագանու անդամներին, լսեց նրանց հարցադրումները: Հակադարձեց ակնաբույժի այն հայտարարությանը, որ հաշվապահությունից են ասել, որ կոմունալ վճարումների համար են պահումներ անում:
«Ոչ ինչպես կարող է պատահել, որ իրենք կատարեն կոմունալ վճարումները»:
Սակայն չափորոշիչով իրենց թույլատրված է, որ ֆինանսատնտեսական վիճակի, բազմաթիվ ուղղություններով ծախսերի կանոնակարգման համար իրականացնեն որոշակի նվազեցումներ, ասում է տնօրենն ու հավելում՝ ինքն էլ է մտնում նվազեցված աշխատավարձ ստացող մարդկանց ցուցակում:
Սամվել Սարգսյանը չհերքեց, որ մամոգրաֆիայի սարքը որոշ խափանումներով է աշխատել: Դրա համար հորդորել է քաղաքացիներին՝ մեկ երկու ամիս հետո կտրոններով մոտենալ՝ ծառայությունը ստանալու համար: «Ելք» խմբակցության ավագանու անդամ Դավիթ Խաժակյանը լսեց տնօրենի մեկնաբանություններն ու ասաց, որ հանցագործության մասին հաղորդում է ներկայացնելու դատախազություն:
