Լուսինե Վասիլյան
«Ռադիոլուր»
Այսօր խորհրդարանը կրկին վերսկսեց «Բյուջե 2013-ի» քննարկումը: Հաջորդ տարվա ֆինանսական գլխավոր փաստաթղթի նախագիծը քննարկվել էր նախորդ քառօրյայի ընթացքում, ապա բյուջետային քննարկումներն ընդմիջվել էին՝ խմբակցություններին ու պատգամավորոներին հնարավորություն տալով առաջարկներ ներկայացնել:
Կառավարությունը ՀՀ Ազգային ժողովից ստացել է 406 առաջարկություն։ Ընդհանուր առմամբ՝ պատգամավորներն առաջարկել են բյուջեի եկամուտներն ավելացնել 137, իսկ ծախսերը՝ 411 մլրդ դրամով:
Կառավարությունը շատ ավելի զուսպ դիրքրոշմամբ է մոտեցել առաջարկներին։ Պետական բյուջեի եկամուտներն ու ծախսերն ավելացվել են 1,2 մլրդ դրամով: Պատգամավորների առաջարկներից մասնակի կամ լրիվ ընդունվել է 67-ը, 137-ը մերժվել է, մնացած առաջարկներին, ըստ ֆինանսների նախարար Վաչե Գաբրիելյանի, տրվել են պարզաբանումներ:
Բյուջեի վերանայված տարբերակում եկամուտները կկազմեն 1 տրլն 32 մլրդ դրամ, ծախսերը՝ 1 տրլն 152 մլրդ դրամ, դեֆիցիտը՝ 119,8 մլրդ դրամ:
Առաջարկությունների մերժման հիմքում դրված է պետական կառավարման ծախսերի պահպանումը նույն մակարդակում:
Խմբակցություններն այսօր ներկայացրին իրենց վերջնական դիրքրոշումները: Դրանք հիմնականում պահպանվել են: Հաջորդ տարվա բյուջեն պաշտպանում են կոալիցիոն երկու կուսակցությունները, փաստաթղթին դեմ են արտահայտվում ԲՀԿ-ն, ՀԱԿ-ը, «Ժառանգությունն» ու ՀՅԴ-ն:
Արծվիկ Մինասյանը ՀՅԴ դիրքրոշումը ներկայացնելիս չթաքցրեց դժգոհությունը խմբակցության մի շարք առաջարկությունները մերժելու վերաբերյալ:
«Կառավարությունը պարզապես հանրությանը ուզում է ասել, որ ամենաճիշտը իրենք են, և ցանկացած ընդդիմախոսի առաջարկություն տեղ չի գտնում այդ ճշտի սահմաններում»:
ՕԵԿ-ը ավելի է հանգիստ է վերաբերվում առաջարկների մեծ մասի մերժվելուն: «Միշտ էլ կառավարությունը առաջարկների մի մասն ընդունել է, մյուս մասի մասին ասել է տեղափոխենք հաջորդ տարիներին», իր ելույթում ասաց Հովհաննես Մարգարյանը։
ՕԵԿ-ը հանգամանորեն ուսումնասիրել է փաստաթուղթը և հասկացել, որ բյուջեն միտում ունի շատ թե քիչ լուծում տալու կուտակված խնդիրներին:
