Զինվորներ տեղափոխող «Ուրալը» Քելբաջարում վթարի է ենթարկվել. կան զոհեր և վիրավորներ
Արցախի Պաշտպանության բանակից խորը ցավով տեղեկացնում են, որ երեկ ժամը 20.00-ի սահմաններում Քարվաճառի զորամասերից մեկին պատկանող «Ուրալ» մակնիշի ավտոմեքենան անձնակազմը տեղափոխելիս` թվով 19 պայմանագրային զինծառայող, Քարվաճառի «Հարուրի ձոր» կոչվող տարածքում, ըստ նախնական տվյալների, հանդիպակաց ընթացող ավտոմեքենայի լույսերի արձակման պատճառով դուրս է եկել ճանապարհի երթևեկելի մասից և գլորվել ձորը, որի հետևանքով մահացել է 4 զինծառայող` ավտոմեքենայի վարորդ, եֆրեյտոր Արթուր Երեմյանը, շարքայիններ Գագիկ Վարդանյանը, Սանասար Փիլոյանը, Մանվել Աբիջանյանը: Տարբեր աստիճանի մարմնական վնասվածքներով 15 զինծառայող ժամը 23.45-ին հասցվել են Վարդենիսի կայազորային հիվանդանոց: Ներկայում նրանցից 6-ին տեղափոխել են Երևանի Կենտրոնական կլինիկական զինվորական հոսպիտալ:
ԼՂՀ ՊԲ-ը շուտափույթ ապաքինում է մաղթում վիրավորներին, զորակցություն հայտնում մահացածների ընտանիքների անդամներին, հարազատներին ու ծառայակիցներին: Պատահարի մանրամասները կհաղորդվեն լրացուցիչ: