Պուտինը հինգերորդ անգամ կստանձնի Ռուսաստանի նախագահի պաշտոնը
Վլադիմիր Պուտինն այսօր հինգերորդ անգամ կստանձնի Ռուսաստանի նախագահի պաշտոնը։ Արարողությունը տեղի կունենա կեսօրին Կրեմլում։
Պուտինը նախագահի պաշտոնը ստանձնելիս արդեն չորս անգամ երդում է տվել։ Եվ ինչպես ՏԱՍՍ-ն է նշում, եթե 2000 թվականին 47-ամյա թեկնածուի օգտին քվեարկել է ռուսաստանցիների 52,94 տոկոսը, 2004 թվականին՝ 71,31, 2012 թվականին՝ 63,6, 2018 թվականին՝ 76,7, ապա այս տարվա մարտի ընտրություններում Ռուսաստանի 71-ամյա երկրորդ և չորրորդ նախագահը ռեկորդային թվով ձայներ է ստացել՝ 87,28%։
Ռուսաստանում երդմնակալության հատուկ արարողությունը մշակվել է 1996 թվականին, երբ առաջին նախագահ Բորիս Ելցինը երկրորդ անգամ պետք է ստանձներ երկրի բարձրագույն պետական պաշտոնը: Արարողությունը տարիների ընթացքում ենթարկվել է փոփոխությունների, բայց դրա հիմնական կետերը մնում են նույնը:
Ինչպես խոստացել է պետության ղեկավարի մամուլի քարտուղար Դմիտրի Պեսկովը, երդմնակալության այսօրվա արարողությունը տեղի կունենա արդեն իսկ հաստատված արձանագրության համաձայն, բայց «որոշ նրբերանգներով»։ Կրեմլը չի հայտնել, թե որոնք դրանք։