Ազգային ժողովի փոխնախագահ Ալեն Սիմոնյանն առաջարկում է սահմանել «կեղծանուն աղբյուր» հասկացությունը և քրեականացնել այդ աղբյուրներով ապատեղեկատվության հրապարակումն ու տարածումը։
«Ֆեյքերի նախագիծ» անվանումը ստացած օրենսդրական փաթեթը շրջանառության մեջ է դրվել օրերս, փոփոխություններ է ենթադրում Քրեական, քրեական դատավարության և քաղաքացիական օրենսգրքերում, նաև` «Զանգվածային լրատվության մասին» օրենքում։
Ըստ նախագծի ՝ կեղծանուն աղբյուրը «համացանցում գրանցված դոմեյն, հոսթինգ ունեցող կայք, օգտահաշիվ կամ ալիք է, որի տնօրինողի նույնականացման տվյալները հրապարակված չեն նույն աղբյուրում կամ հանրահայտ չեն»:
Առաջարկվում է պատասխանատվություն սահմանել «համացանցում դիտավորությամբ հանրային հետաքրքրություն ներկայացնող հարցի վերաբերյալ ակնհայտ կեղծ տեղեկատվություն հրապարակելու համար»։
Ըստ նախագծի՝ արարքը պատժվում է տուգանքով՝ նվազագույն աշխատավարձի հիսնապատիկից հարյուրապատիկի չափով, իսկ եթե կատարվել է կազմակերպված խմբի կողմից՝ ազատազրկմամբ մեկից երեք տարի ժամկետով:
Նույն կարգավորումն է առաջարկվում կեղծանուն աղբյուրով անձին վիրավորելու կամ զրպարտելու դեպքում։ Արարքը պատժվում է տուգանքով, բայց եթե կատարվել է կազմակերպված խմբի կողմից, պատիժը երկուսից չորս տարի ազատազրկումն է։
Մոտեցումների խստացումը հիմնավորվում է ապատեղեկատվության ծավալների ավելացմամբ ու այդ երևույթի հանրային վտանգավորությամբ։
«Ապատեղեկատվության էական մասը հրապարակվում է այնպիսի աղբյուրների կողմից, որոնց նույնականացումն ընթերցողի կողմից անհնար է, և որոնք ԶԼՄ օրենքի իմաստով զանգվածային լրատվամիջոց չեն, այլ կերպ՝ «ֆեյք» են »,-նշվում է նախագծի հիմնավորման մեջ։
Նախորդ քառօրյայի ընթացքում Ազգային ժողովը ընդունեց Քաղաքացիական օրենսգրքում փոփոխություններ առաջարկող նախագիծը, որով վիրավորանքի և զրպարտության համար նախատեսված փոխհատուցումների չափը եռապատկվեց։ Այդ նախագիծը ևս հեղինակել էր ԱԺ փոխնախագահ Ալեն Սիմոնյանը։
