«Հունիսի 27-ի համեմատ Սևանա լճի մակարդակը բարձրացել է 1 սմ-ով՝ կազմելով 1900.75 մ, նախորդ տարվա նույն օրվա համեմատ մակարդակը բարձր է 5 սմ-ով»։ ՇՄՆ «Հիդրոօդերևութաբանության և մոնիթորինգի կենտրոն» ՊՈԱԿ-ից հայտնում են, որ հունիսի 1-ից ի վեր լճի մակարդակի ընդհանուր բարձրացումը կազմել է արդեն 17 սմ։
Այս ցուցանիշով 2026 թվականն արդեն հավասարվել է 1993 թվականի նույն ժամանակահատվածի արդյունքին, և առկա են բոլոր բարենպաստ հիդրոօդերևութաբանական նախադրյալները, որպեսզի առաջիկա օրերին այն գերազանցի 1993 թվականի ցուցանիշը։
Հանրապետությունում 2026 թվականի գարունը եղել է բավական տեղումնառատ, իսկ գարնանային վարարումների հոսքի ծավալները գրանցվել են նորմայից բարձր։ ՀՀ շրջակա միջավայրի նախարարության «Հիդրոօդերևութաբանության և մոնիթորինգի կենտրոն» (ՀայՀիդրոմետ) ՊՈԱԿ-ի տնօրեն Լևոն Ազիզյանն է մամուլի ասուլիսով հանդես եկել և տեղեկացրել, որ գարնանային վարարումների հոսքի ծավալները հատկապես բարձր են եղել Հրազդան, Արփա, Վեդի, Ձկնագետ և Որոտան գետերի ավազաններում՝ կազմելով նորմայի մինչև 170 տոկոսը։ Առատ տեղումները շարունակվել են հունիսին։
Անդրադառնալով Սևանից բացթողնվող ջրառին՝ Լևոն Ազիզյանը մանրամասնեց, որ տեղումնառատ սեզոնով պայմանավորված՝ այս տարի այդ բացթողումը ուշ կլինի։
