Լուսինե Վասիլյան
«Ռադիոլուր»
Կոռուպցիայի դեմ պայքարի մասին նոր իշխանությունները շատ են խոսում. ամենահաճախ հնչող կապակցությունն է բանավոր հայտարարություններում, ամենաշատ հանդիպող հիմավորումը՝ մշակվող նախագծերում ու փաստաթղթերում:
Համարժե՞ք է հակակոռուպցիոն հռետորաբանությունը իրական պայքարին, ի՞նչ իրավիճակ ունենք, ի՞նչ է փոխելու վերջերս ընդունված և ուժի մեջ մտած հակոռուպցիոն ռազմավարությունը: Այն արդեն 4-րդ փաստաթուղթն է, որ մշակվում է կոռուպցիան հաղթահարելու համար:
«Այդ փաստաթղթով կառավարությունը ստանձնում է ինստիտուցիոնալ, մասնագիտացված, մշտական գործող համակարգ ստեղծելու հանձնառություն: Սա այս փաստաթղթի և նախորդների գլխավոր տարբերությունն է», — «Ռադիոլուրի հյուրասրահում» ասել է Թրանսփարենսի Ինթերնեշնլ հակակոռուպցիոն կենտրոնի ծրագրերի ղեկավար Վարուժան Հոկտանյանը:
Փաստաթղթով նախատեսվում է 2 նոր մարմնի ձևավորում. կոռուպցիայի կանխարգելման համար գործելու է Կոռուպցիայի կանխարգելման հանձնաժողովը, որը փոխարինելու է Բարձրաստիճան պաշտոնատար անձանց էթիկայի հանձնաժողովին և ունենալու է ավելի լայն լիազորություններ:
Կոռուպցիոն հանցագործությունների բացահայտման համար ստեղծվելու է նոր իրավապահ մարմին`Հակակոռուպցիոն կոմիտեն, որին փոխանցվելու են Հատուկ քննչական ծառայության, Քննչական կոմիտեի, Ոստիկանության և Պետեկամուտների կոմիտեի` կոռուպցիայի դեմ պայքարի գործառույթները:
Հոկտանյանը հույս ունի, որ նոր ռազմավարությամբ կոռուպցիայի դեմ պայքարն առավել համակարգված բնույթ կստանա: Մինչ այժմ վարվող պայքարն, ըստ նրա, իրավիճակային է, սահմանափակվում է առանձին դեպքերով ու իրավիճակներով:
