Ինչպիսի կառավարություն հաջողվեց ձեւավորել
Նիկոլ Փաշինյանի ձևավորած կառավարությունն այսօր իր առաջին նիստն է անցկացրել: Գործադիրի նիստի օրակարգում ընդգրկված հարցերով ինչպես պաշտոնանկություններ են տեղի ունեցել, այնպես էլ՝ նշանակումներ:
Կառավարության նիստից առաջ վարչապետ Նիկոլ Փաշինյանն անձամբ է հանդիպել գործադիրի շենքի առջև բողոքի ակցիա անցկացնող քաղաքացիների հետ:
Նորեկները կառավարության նիստում: Նիկոլ Փաշինյանի ձևավորած կառավարությունն այսօր իր առաջին նիստը անցկացրեց: Կառավարության նորանշանակ անդամները շենքի մոտ առաջինը հանդիպեցին բողոքի ակցիայի մասնակիցները: Նրանց մոտեցավ նաև վարչապետ Նիկոլ Փաշինյանը:
Մեկ առ մեկ քաղաքացիներին լսելուց և նամակները վերցնելուց հետո վարչապետը շտապեց կառավարության նիստի: Մինչ այդ, հայտարարեց՝ մարդիկ օգտվում են ազատ արտահայտվելու հնարավորությունից:
Տրանսպորտի, կապի ու ՏՏ նախարար Աշոտ Հակոբյանը ոլորտին ծանոթ չէ, ընդամենը երեք օր է նախարարի պաշտոնում: Նախկին քննիչը այս փուլում ծանոթանում է ոլորտի խնդիրների հետ: Հակոբյանը ԲՀԿ անդամ է անցյալ տարվա հոկտեմբերից: Նախարար է նշանակվել թիմային որոշման արդյունքում: «Որքանով Հակոբյանը կապ ունի տրանսպորտի ոլորտի հետ». ուղիղ հարցին նորանշանակ նախարարին:
«Կարծում եմ, որ նախորդ աշխատանքս եթե չօգնի, ապա չի վնասի ոլորտին»:
Առողջապահության նախարար Արսեն Թորոսյանի նշանակումը մեծ աղմուկ բարձրացրեց համացանցում: Նախարարը չգիտի պատվեր էր, թե՝ ոչ։ Գիտի, որ այս պահին աշխատում է:
«Դեղերը դեղատոմսով բաց թողնելու որոշումը կհետաձգվի մեկ տարով: Հակաբիոտիկների մասով մասնագետները որոշել են թողնել ուժի մեջ»:
Արդարադատության նախարար Արտակ Զեյնալյանն ըստ էության նոր չէ գործադիրում: Նա նախկինում զբաղեցրել է առողջապահության փոխնախարարի պաշտոնը: Գործադիրի կազմում այսօր կրկին համալրումներ եղան՝ ՊԵԿ նախագահ նշանակվեց ֆինանսների նախարարի տեղակալ Դավիթ Անանյանը: Նա այս պաշտոնում փոխարինեց Վարդան Հարությունյանին: Վերջինս ինքն է ցանկացել թողնել պաշտոնը:
Առաջին փոխվարչապետ Արարատ Միրզոյանը Դավիթ Անանյանին կոչ արեց ուշադրության առանցքում պահել հատկապես մի քանի հարցեր, մասնավորապես, մաքսակետերում վերջին օրերին միջնորդ կազմակերպությունների ինքնիրավչության վրա և ոչ միայն:
ՀՀ վիճակագրական կոմիտեի նախագահ 6 տարի ժամկետով նշանակվեց Ստեփան Մնացականյանը։ Նա մինչ այս զբաղեցնում էր ԱՎԾ պետի պաշտոնը: Փաշինյանը կարևորեց վիճակագրական տվյալների՝ վստահելիության մակարդակի բարձրացման հարցը, հայտարարեց՝ վիճակագրությունը պետք է դուրս լինի քաղաքական գործընթացներից: