Ինչպե՞ս է Հայաստանը վերակառուցում գիտության և բարձրագույն կրթության համակարգը. «Դպրություն»

Գիտությունը ժամանակակից պետությունների զարգացման առանցքային շարժիչ ուժերից է, և Հայաստանում այն աստիճանաբար ստանում է ավելի համակարգված և նպատակային աջակցություն։ Գիտության կոմիտեն այս գործընթացում առանցքային կառույց է՝ պատասխանատու լինելով գիտական քաղաքականության մշակման, ֆինանսավորման բաշխման և գիտական համակարգի զարգացման համար։

«Ոլորտում նախատեսվում են մի շարք կարևոր փոփոխություններ, որոնց մասին մեր գործընկերներն ու հայրենակիցները գիտեն։ Դրանք կառուցվածքային փոփոխություններն են, որոնց մասին գրված է «Բարձրագույն կրթության և գիտության մասին օրենք»-ում։ Ըստ էության, մենք նաև վերափոխում ենք գիտության ոլորտի կազմակերպման տրամաբանությունը»,- ասում է ԿԳՄՍ նախարարության բարձրագույն կրթության և գիտության կոմիտեի նախագահ Սարգիս Հայոցյանը։

ԿԳՄՍՆ բարձրագույն կրթության և գիտության կոմիտեի՝ 2025 թվականի գործունեության վերաբերյալ ամփոփ տեղեկատվությունը ներառում է ՀՀ կառավարության 2021-2026 թվականներին գործունեության միջոցառումների ծրագրով Բարձրագույն կրթության և գիտության կոմիտեին վերապահված և 2025 թվականին իրականացրած ծրագրերն ու միջոցառումները՝ բարձրագույն կրթության և գիտության ոլորտներում։

Անդրադարձ է կատարվել հետևյալ թեմաներին

• 2025 թվականի առանցքային ցուցանիշներ՝ ըստ ոլորտների,
• գիտության ոլորտում պետական ֆինանսավորման աճ․ մարդկային ռեսուրսների ամրապնդման և ենթակառուցվածքների արդիականացման միջոցառումներ,
• գիտական դրամաշնորհային ծրագրեր,
• միջազգային համագործակցություն․ Սփյուռքի և օտարերկրյա գիտնականների ներուժի համախմբում,
• գիտության հանրայնացմանն ուղղված միջոցառումներ,
• 2025-26 ուստարվա բուհական ընդունելությունը՝ թվերով (բակալավրի առկա ուսուցմամբ կրթական ծրագրերով),
• պետության համար առաջնահերթ և կարևոր մասնագիտություններով ընդունելության խթանում․ ուսման վարձի լրիվ փոխհատուցում, բարձր կրթաթոշակների նախատեսում,
• առավելագույն և նվազագույն ընդունված ուսանող ունեցող կրթական ծրագրեր,
• հեռակա ուսուցմամբ ընդունելություն,
• ուսանողների աջակցության այլ ծրագրեր,
• աստիճանաշնորհում․ գիտական աստիճանների և կոչումների շնորհում,
• ակադեմիական քաղաք ծրագիր,
• բարձրագույն կրթության և գիտության ոլորտների իրավական շրջանակի լրամշակում։