ՀՀ փոխվարչապետի խորհրդական Սուրեն Քրմոյանի և ԱՆ աշխատակազմի Հակակոռուպցիոն և քրեակատարողական քաղաքականության մշակման վարչության պետ Արփինե Սարգսյանի, գլխավորությամբ այսօր կայացել է Արդարադատության նախարարության, «Իրավական կրթության և վերականգնողական ծրագրերի իրականացման կենտրոն» ՊՈԱԿ-ի և ՄԱԿ-ի մանկական հիմնադրամի համագործակցությամբ Անչափահասների արդարադատության խորհրդի 2019 թվականի ամփոփիչ նիստը:
Սուրեն Քրմոյանի խոսքով` անչափահասների արդարադատության խորհուրդը արձանագրել է արդյունքներ, և ներկայումս կառավարության նիստերին, պետական ցանկացած ձևաչափով քննարկումներում և որոշումների կայացման հիմքում արձանագրվում է նաև երեխայի լավագույն շահի պահպանման խնդիրը:
Ինչպես Նշենց Արփինե Սարգսյանը` Քրեական և Քրեական դատավարության օրենսգրքերում մեծ ուշադրություն է դարձվում անչափահասներին: Կատարված օրինագծերով` իջեցվել է անչափահասների պատժի կրման շեմը, նաև ուշադրություն է դարձվել 18-21 տարին լրացած իրավախատում կատարած անձանց պատժի կրման ժամկետներին և ձևերին:
Արփինե Սարգսյանը նաև նշեց, որ Երեխաների նկատմամբ բռնության դեմ պայքարի գործողությունների ծրագրում լուծումներ գտնելու համար Անչափահասների արդարադատության խորհրդի կողմից պետք է ներկայացվեն լրացումներ և առաջարկություններ, որպեսզի դրույթները գործուն դառնան և լինեն աշխատանքի համար արդյունավետ:
Նիստի ընթացքում անդրադարձ կատարվեց նաև անչափահասների հանցավորության կանխարգելմանը: Գլխավոր դատախազության ավագ դատախազ Գայանե Գասպարյանի կարծիքով` պետք է առանձնացվեն հանցանք կատարած անչափահասների այն խմբերը, որոնց նկատմամբ քրեական հետապնդում չի իրականացվում` ոչ արդարացնող հիմքով: Մասնավորապես` տուժողի հետ հաշտության հիմքով հետապնդում չիրականացնելու, օրենքով սահմանված քրեական պատասխանատվության ենթարկվելու տարիքի հասած չլինելու դեպքերը:
Գայանե Գասպարյանը ընդգծեց, որ նշված անչափահասների նկատմամբ միջդատավարական վարույթում կայացվում են որոշումներ` քրեական հետապնդում չիրականացնելու վերաբերյալ, որից հետո նշված խումբ երեխաները, ըստ էության, մնում են պետական վերահսկողությունից դուրս և շատ կարևոր է հատկապես այս խմբի անչափահասների հետ վերականգնողական, դաստիարակչական աշխատանքների կատարումը:
Անչափահասների հարցաքննության հարցը ևս կարևոր է` ինչպես նշեց Քննչական կոմիտեի նախագահի տեղակալ Արսեն Այվազյանը` մեր իրավակիրառ պրակտիկայում վկա լինելը շատ բարդ գործընթաց է իրենից ենթադրում, այս պարագայում իրավունք չունենք հոգեբանական տրավմայի ենթարկել անչափահասին, իսկ քննությունը պետք է այնպես տարվի, որպեսզի որքան հնարավոր է երեխան քիչ տրավմայի ենթարկվի:
